Universitet illərində sadə bir çətinlikdən çıxış edən Dru Houston qısa zamanda dünyanın ən tanınmış texnoloji şirkətlərindən birini qurdu. Onun ideyası unudulan USB yaddaşlardan başladı, milyardlarla dəyərə çatan “Dropbox”la nəticələndi.

Hauston tələbə olduğu dövrdə layihə fayllarını daşımaq üçün USB yaddaşına güvənirdi. Ancaq hər dəfə yaddaşı evdə unutmaq, onu çıxılmaz vəziyyətə salırdı. Bu gündəlik problem gənc sahibkarı düşündürdü və o, faylları internet üzərindən saxlamaq və paylaşmaq imkanı verən sadə, amma effektiv bir sistem yaratmaq qərarına gəldi.

İlk mərhələdə investor tapmaq çətin idi. Bir çoxları ideyanı rədd etdi. Lakin Hauston inadla davam etdi və “Dropbox”u istifadəsi asan bir qovluq kimi təqdim etdi. İnsanlar heç bir texniki biliyə ehtiyac duymadan fayllarını paylaşa bildilər. Bu sadəlik “Dropbox”u qısa müddətdə milyonlarla istifadəçinin seçiminə çevirdi.

Şirkət bu gün də texnologiya sektorunda öz mövqeyini qoruyur. 2025-ci ilin sentyabr ayına görə “Dropbox”un bazar kapitalizasiyası 8,06 milyard ABŞ dolları təşkil edir. Bu, illər əvvəl tələbə otağında yaranmış sadə bir fikrin nəhəng biznesə çevrildiyini təsdiqləyir.

Dru Haustonun fəlsəfəsi aydındır: “Ən yaxşı biznes ideyaları çox vaxt gündəlik həyatdakı sadə problemləri həll edir”. Onun hekayəsi isə sübut edir ki, uğur bəzən ən sadə müşahidələrdən doğur.