Düşmənin 3 hərbi qulluqçusu məhv edilib, 2-si yaralanıb
28-07-2021, 09:42
İyulun 28-i saat 00:50 radələrindən başlayaraq, Ermənistan silahlı qüvvələrinin bölmələri Basarkeçər rayonu ərazisindəki müxtəlif istiqamətlərdə yerləşən döyüş mövqelərindən Azərbaycan Ordusunun Kəlbəcər rayonu ərazisindəki mövqelərini atıcı silahlar və qumbaraatanlardan növbəti dəfə intensiv atəşə tutub. Qarşı tərəfdən açılan atəş nəticəsində iki hərbi qulluqçumuz - Əliyev Sadiq Nizami oğlu və İmranlı İmran Dilqəm oğlu yaralanıb.
Ordu.az xəbər verir ki, Ermənistan Müdafiə Nazirliyi atışmada məhv edilən və yaralanan erməni hərbi qulluqçular barədə məlumat yayıb.
Məlumatına görə, düşmənin 3 hərbi qulluqçusu məhv edilib, 2-si yaralanıb.
Qeyd edək ki, Azərbaycan Ordusunun bu istiqamətdə yerləşən bölmələri tərəfindən adekvat cavab tədbirləri görülür.