“Hacı Əbdülün yasına gedə bilmədim”
“Karantin günlərində mən də qaydalara riayət edib evdə oturmuşam. Hazırda bağ evinə çəkilmişəm. Hesab edirəm ki, koronavirusa qalib gəlmək üçün hamılıqla evdə qalmalıyıq”.

Bu fikirləri Modern.az-a Azərbaycanın eks-prezidenti Ayaz Mütəllibov karantin rejiminə riayət edilməsindən danışarkən deyib.

“Üstəlik 65 yaşdan yuxarı olan insanlar risk qrupuna daxildirlər. Mənim də kifayət qədər yaşım var. Qaydaları poza bilmərəm”-deyə eks prezident əlavə edib.

Ayaz Mütəllibov “Tövbə” cəmiyyətinin sədri Hacı Əbdülün dünyasını dəyişməsindən də söz açıb:

“Hacı Əbdül qəfil dünyasını dəyişdi. Sağlığında çevik və sözünü deyən biri olub. Allah rəhmət eləsin! Məlum səbəblərdən onun yasına gedə bilmədim. Ancaq köməkçim mənim adımdan dəfn mərasiminə getmişdi. Mən də Hacı Əbdülün oğluna zəng edərək, başsağlığı verdim”.

"Tövbə" cəmiyyətinin sədri Hacı Əbdül Əbdülov aprelin 6-da 79 yaşında dünyasını dəyişib. O, vaxtilə eks-prezident Ayaz Mütəllibovun tərəfdarı kimi tanınmışdı.