Təhsil naziri Emin Əmrullayev 2021-2022-ci tədris ilinin təşkili ilə bağlı açıqlamalar verib. Onun sözlərinə görə, sentyabrın 22-dən I-IV siniflər, sentyabrın 29-dan V-XI siniflər, eləcə də ali təhsil və orta ixtisas təhsili müəssisələri əyani tədrisə başlayır.

Azərbaycanda təhsil müəssisələri 2020-ci il martın 3-dən koronavirus infeksiyası üzündən qapadılıb. Həmin il sentyabrın 15-dən başlayaraq təhsil müəssisələri mərhələlərlə açılıb. Nazirlər Kabinetinin 29 oktyabr 2020-ci il qərarı ilə təhsil müəssisələri yenə məsafədən iş formasına keçib, 2021-ci il fevralın 1-dən ümumi təhsil müəssisələrində ənənəvi tədris qismən bərpa olunub.

2019-cu ilin dekabr ayında Çində üzə çıxaraq dünyanı bürüyən koronavirus infeksiyasına Azərbaycanda ilk yoluxma 2020-ci il fevralın 28-də qeydə alınıb. Bu il sentyabrın 7-dək 445278 yoluxma olub, 5879 xəstə vəfat edib.