Son vaxtlar Azərbaycan Respublikasının Dövlət Dəniz Administrasiyasının (ARDDA) rəhbərliyinin adı müxtəlif qalmaqallı situasiyalar, qanun pozuntuları və digər neqativ hallarla bağlı ölkə mətbuatında dərc olunan materiallarda tez-tez hallandırılır. Məsələn, bir müddət əvvəl Qəmbər Səfərov adlı vətəndaşa məxsus "Yunıy moryak” adlı gəminin oğurlanması ilə bağlı yayımlanan məlumatlarda qeyd olunmuşdu ki, bu məsələ ətrafında ciddi qanun pozuntularına yol vermiş tərəf, məhz ARDDA-nın rəisi Qüdrət Qurbanov olmuşdur. Hətta məhkəmə sənədlərində də təsdiq edilmişdi ki, Dəniz Administrasiyası heç bir hüquqi əsas olmadan və müvafiq sənəd təqdim edilmədən qanunsuz olaraq, gəminin qeydiyyatını rəsmiləşdirib və başqa birinə mülkiyyət hüququ barədə sənəd verib.

Savash.org xatırladır ki, bu günlərdə isə Q.Qurbanovun oğlu Orxan Qurbanov da medianın gündəminə gəlib. Orxan Qurbanov MTN-də işlədiyi vaxt, atasının Eldar Mahmudovla dostluq münasibətləri ona heç işə getməyə də "imkan vermirdi” Artıq bir neçə aydır ki, sabiq MTN başçısı Eldar Mahmudovun müxtəlif adamlarla əlaqələri haqqında ölkə mətbuatında fərqli-fərqli yazılar dərc olunur. Bəzən, bu "əlaqələr”də hətta dəxlisiz şəxslərin adları hallanır. Oxucularda sual yarana bilər ki, Eldar Mahmudovu jurnalistlər daha kimlərə dost edib bağlamadılar?!

Ancaq biz apardığımız araşdırma zamanı çox ciddi faktlar üzə çıxdığına görə, bu yazını oxuculara təqdim etməyi lazım bildik. Sabiq MTN başçısı Eldar Mahmudovun vaxtilə Azərbaycan Dəniz Administrasiyasının rəisi Qüdrət Qurbanovla dost olduğu nə jurnalistlərə, nə də məmurlara sirr deyil. Əlbəttə, Eldar Mahmudovun "möhtəşəm” vaxtlarında irili-xırdalı əksər məmurlar onunla dost olmağa, isti münasibətlər saxlamağa çalışırdılar. Qüdrət Qurbanov da hardan biləydi ki, bir gün digər güc strukturları Eldar Mahmudovun "qoşun”ununa qalib gələcək? Nəticədə isə Qüdrət Qurbanov sabiq milli təhlükəsizlik naziri ilə qol-boyun vəziyyətdə fotolar çəkdirdiyinə peşman olacaq….

Əvvəla başlayaq ondan ki, vaxtı ilə MTN-in zabiti olan Orxan Qüdrət oğlu Qurbanovun indi də DTX-də çalışdığı barədə məlumatlar var. Hətta onun dostları və yaxınları da deyir ki, Orxan Qurbanov MTN-də işlədiyi vaxt, atasının Eldar Mahmudovla dostluq münasibətləri ona heç işə getməyə də "imkan vermirdi”. Hətta O.Qurbanovun öz çevrəsində zarafatca "ancaq maaşdan-maaşa işə getdiyini” etiraf etməsi barədə də məlumat əldə etmişik. Bəs necə oldu ki, bu şəxs yeni strukturda da öz yerini qoruyub saxladı? Əlbəttə, bu yeni yazının mövzusudur… Əksinə hələ adı MTN-də "əməkdaş” kimi getdiyi vaxtlarda da, onun xarici ölkələri gəzib özünə modelyer "adaxlı ovuna” çıxdığı deyilir. Monako, İspaniya, Fransa, İtaliya, Türkiyə…

Bu gənc öz "sərgüzəşt”lərini "İnstagram” profilində paylaşmaqdan da çəkinmir. Bəli, deyilənlərə görə, bu şəxs elə bu günlərdə də bu "ovçuluğu davam edir. Misal üçün, atası Qüdrət Qurbanovun rəqibi sayılan Ziya Məmmədov da öz oğluna ovçuluğu tərgizdirə bilmədi. Ancaq onun oğlu modelyer yox, ayı ovlamağı xoşlayırdı. Ola bilsin ki, bu günlərdə Ziya Məmmədov nəqliyyat naziri olduğu üçün Anar Məmmədov ayı ovlayır. Ancaq vaxtı ilə Ziya Məmmədov Dəmir Yol İdarəsinin şefi olanda elə onun oğlu da model ovlayırdı, hətta "STİL” jurnalına sponsorluq edərək Bakının modellərinin fotolarını o jurnalda tirajlayırdı. Ancaq sonra atası NN-şefi təyin olunan kimi, Anar Məmmədov özünü yığışdırıb ciddi aparmağa başladı və modellərdən birbaşa ayılara keçdi. Sonda ayı məsələsi də ona çox baha-başa gəldi.

Orxan Qurbanova gəldikdə isə, bu ovçuya da cızığından çıxıb mətbuatın əlinə düşməmək üçün Qüdrət Qurbanovun köməkçisi Ülvi Həsənov kömək edir. Ancaq keçən il Ülvi Həsənovun başı möhkəm qarışıq olduğu üçün Orxan Qurbanov Haqqin.az saytının rəhbəri Eynulla Fətullayevin toruna düşmüşdü. Düzdür, sonra gücbalayla olsa da onu Eynullanın torundan çıxardılar, hətta Eynulla Fətullayev Qüdrət və Orxan Qurbanovlar barədə, sizə deyim ki, ürəyləri istəyən bir yazı da yazdı. Oxucuda sual doğura bilər: yaxşı, Qüdrət Qurbanovun köməkçisinin başı nəyə qarışmışdı ki, Orxan Qurbanovu Eynullanın toruna düşməyə imkan verildi.

Ülvi Həsənova Qüdrət Qurbanov tərəfindən Səbail rayonu Xanlar küçəsi 1 ünvanında yerləşən 20-dən artıq qarajı sökdürərək, həmin ərazidə bir neçə mərtəbəli təhsil mərkəzi yaratmaq tapşırığı verilmişdi. Düzdür, həmin ərazidə yeni inşa edilən sahə Qüdrət Qurbanovun adına deyil, ancaq qaraj sahiblərinin hamısı ilə görüşən yenə də Qüdrət Qurbanovun köməkçisi Ülvi Həsənov olub və əlbəttə ki, o bütün danışıqları Qüdrət Qurbanovun adından aparıb.
Bu barədə növbəti yazımızda məlumat verəcəyik…

İndi isə keçək Qüdrət Qurbanovun qaynı Babək Tağıyevə. Bu şəxs uzun illər polis orqanlarında çalışıb və sonra birdən-birə polis orqanlarından xaric olunaraq təqaüdə çıxıb. Sual doğura bilər ki, axı niyə, Babək Tağıyevin hələ təqaüd üçün yaş həddi çatmasa da, təqaüdə çıxıb. Bacıoğlunun adı vaxtı ilə MTN-də və sonra DTX-də gedir, dayı hələ cavan olaraq əməliyyat işindən birdən-birə uzaqlaşaraq təqaüdə çıxır. Bunların hamısı biz də elə şübhə yaratdı ki, çox güman bu yaxınlarda Qüdrət Qurbanov özü də cavan yaşlarında təqaüdə hazırlaşır. Çünki bu gün , artıq Qüdrət Qurbanovun bir başa vəzifə borclarının icrasında yol verdiyi müxtəlif özbaşınalıqlardan ziyan çəkən dənizçilər dilə gəliblər. Belə ki, müxtəlif instansiyalara, o cümlədən təqdim olunan açıqlamalardan belə qənaətə gəlmək olur ki, bu gün Dövlət Dəniz Administrasiyasında formalaşdırılmış rüşvət və korrupsiya şəbəkəsi bu qurumun xidmətlərindən istifadə etməli olan insanların səbir kasasını doldurub.

Hətta bir müddət əvvəl KİV-də yayımlanan məlumatlarda qeyd olunmuşdu ki, yaranmış vəziyyətdən son dərəcə narazı və narahat olan dənizçilər, artıq birbaşa ölkə rəhbərliyinə müraciət etməyə hazırlaşırlar. Bu xüsusda dənizçiləri ən çox narahat edən məqamlardan birinin isə, ARDDA-da son vaxtlar əsil alver predmetinə çevrilmiş sertifikat və diplomların verilməsi prosedurları ilə bağlı olduğu qeyd olunur. Dənizçilərin sözlərinə görə, yük gəmilərində, tankerlərdə ağır iş şəraitində çalışan bu insanlar hər dəfə dənizə çıxmamışdan əvvəl Dövlət Dəniz Administrasiyasına qazanclarının müəyyən bir hissəsini rüşvət olaraq vermək məcburiyyəti qarşısında qalırlar. Bu xüsusda açıqlama verən mənbə deyir: "...Bu rüşvəti verməyə məcburuq. Çünki başqa cür dənizə çıxmaq imkanımız olmur. Belə ki, dənizə çıxmaq üçün hər bir matros, bosman və digər dənizçilər müxtəlif sertifikatlar təqdim etməlidirlər. Xəzərdə və yaxud dünya sularında üzməsindən, həmçinin çalışdığı gəminin ölçülərindən asılı olaraq hər bir dənizçiyə 7-8 sertifikat verilir. Bu sertifikatları verən qurum da məhz Dövlət Dəniz Administrasiyasıdır. Burada isə, həmin sertifikatları sadəcə olaraq satırlar. Belə ki, sertifikatlara görə ödənilən dövlət rüsumundan başqa, hər bir dənizçi Administrasiyanın rəisi Qüdrət Qurbanov tərəfindən müəyyən edilmiş əməkdaşlara bir sertifikata görə 150 manat əlavə pul ödəməli olur. Tələb olunan məbləğ verilmədikdə isə, təbii ki, dənizçi sertifikatları ala bilmir və bu səbədən də dənizə çıxa bilmir...”

Qeyd edək ki, aldığımız məlumatlarda ARDDA-da törədilən müxtəlif maxinasiyalarla bağlı ən çox adları çəkilən məmurlar rəis müavini Ehtiram müəllim və maliyyə şöbəsinin müdiri Etibar müəllimdir. Həmçinin təqdim edilən açıqlamalarda Dövlət Dəniz Administrasiyasında müxtəlif diplomların da "açıq satışa” çıxarıldı vurğulanır. Bildirilir ki, qurumun rəhbərliyi tərəfindən matros diplomu 3000 manata, bosman diplomu isə 5000 manata təklif olunur...