Şeyx Heydərdən sonra səfəvilər və onların tərəfdarları Qızılbaş adı ilə tanınırdı. Şah İsmayıl hakimiyyətə gəldikdən sonra isə bu ad siyasi bir kimlik qazanaraq yeni yaranmış dövlətin adında da Qızılbaş dövləti (Dövləti Qızılbaş) şəklində işlənməyə başlandı.
Bütövlükdə şeyx Heydər tərəfindən həyata keçirilən uniforma dəyişikliyi Səfəvilərdə Ərdəbil təkkəsinə bağlılıq və mənsubiyyət, eləcə də kimlik duyğusunun möhkəmlənməsinə kömək etdi. İndi onlar mənsubluq hissini gücləndirən bu uniforma dəyişikliyindən və onun əsasında yaranan yeni Qızılbaş adını daşımaqdan mənəvi zövq alırdılar.
Qeyd edək ki, əvvəllər zahiri əlamətlərinə görə Səfəviləri bu ad ilə çağırırdılarsa, sonradan Qızılbaş kəliməsindən Osmanlılar Səfəviləri təhqir etmək, aşağılamaq məqsədi ilə istifadə etmişdilər.
Ancaq Ərdəbil sufiləri bu adla çağırılmaları ilə bağlı həmişə fəxr etmişlər. Onlar dövlətlərini "Dövləti Qızılbaş", hökmdarlarını "Padişahi Qızılbaş", ölkələrini "Qızılbaş ölkəsi", dillərini isə "Qızılbaşca" adlandırmaqdan çəkinməmişlər.
Elbrus Vahidov
TEREF