Mirdamət Sadıqovdan şikayətlər günü-gündən artır



İsmayıllıda vəziyyət günü-gündən pisləşir. Rayon sakinlərinin Qaynar.info-ya verdiyi məlumata görə, icra başçısı Mirdamət Sadıqovdan narazıların sayı hər ötən gün daha da artır.

İsmayıllıdakı qiyamdan sonra keçmiş əmək və əhalinin sosial müdafiəsi naziri Füzuli Ələkbərovun qardaşı Nizami Ələkbərovu əvəzləyən Mirdamət Sadıqov rayonu şəxsi mülkünə çevirib. Sakinlərin dediyinə görə, bütün gəlirli sahələri ələ keçirən icra başçısı Azərbaycanın dilbər güşələrindən olan İsmayıllının bütün turizm sektorunu öz nəzərətinə götürüb. İndi rayondakı əksər turizim obyektlərinin sahibi Mirdamət Sadıqovdur.

Həmişə sıx meşələri ilə məşhur olan İsmayıllının icra başçısı ağaclara da qənim kəsilib. Mirdamət Sadıqovun tapşırığı ilə meşəliklər kəsilir, odun olaraq sakinlərə və mebel istehsalı ilə məşğul olan firmalara satılır. Rayonda əhaliyə qazın verilişi normal səviyyədə olmadığından sakinlər də məcburiyyət qarşısında qalaraq meşələri qırır. İsmayıllının yalnız rayon mərkəzi tam olaraq qazlaşdırılıb. Bəzi kəndlərə qaz xətləri çəkilsə də, mavi yanacağın verilişi bərbad səviyyədədir. Bir çox kəndlər isə qazı sonuncu dəfə SSRİ dövründə görüb.

Sakinlərin verdiyi məlumata görə, Mirdamət Sadıqov bir müddət əvvəl Qalacıq kəndində yeni daş-çınqıl karxanası istifadəyə verib. Karxananı xammalla təmin etmək üçün rayondakı çaylarda qanunsuz olaraq qazıntı işləri aparılır, təbii sərvətlər dağıdılır.

Bütün bunlarla kifayətlənməyən Mirdamət Sadıqov İsmayıllı Dövlət Təbiət Qoruğunun ərazisinə də əl atıb. Belə ki, o, qoruğun bir hissəsini yaxın adamına həvalə edib. “Green House” istirahət mərkəzinin sahibi olan bu şəxs qoruğun ərazisində koteclər tikib. Bu koteclərdə bir nəfərin bir günlük istirahəti 100-120 manata başa gəlir.

İsmayıllı sakinlərinin sözlərinə görə, Mirdamət Sadıqovun gəlişindən sonra rayonda heç bir abadlıq işi aparılmayıb. Yalnız İcra Hakimiyyətinin binasının önünü təmir etdirən başçı bununla da işini bitmiş hesab edib. Dövlət tərəfindən rayona ayrılan milyonlar isə sanki havaya sovrulub. Bu pullar yalnız Mirdamət Sadıqovun və yaxın ətrafının varlanmasına xidmət edib.

İsmayıllıda məmur özbaşınalığı da baş alıb gedir. Bütün idarə və müəssisələrdə vətəndaşlardan hər işə görə rüşvət tələb edilir. İcra başçısının qəbuluna gedənlər, Bakıya şikayət edənlər isə yerli məmurlar tərəfindən hədələnir, qorxudulur.

Bütün bunlar onu göstərir ki, Mirdamət Sadıqov xələfi Nizami Ələkbərov kimi İsmayıllını növbəti üsyana hazırlayır. Yəqin ki, seçki ilində belə özbaşınalıqlar ölkə rəhbərliyinin də nəzərindən yayınmayacaq və tezliklə tədbir görüləcək.



Qarşı tərəfin münasibətini dərc etməyə hazırıq.