“Nazim Bəydəmirli Gədəbəy rayonunun deputatı olub. Özü də yaxşı deputatlardan olub. Gədəbəyin problemlərini bilən, onu danışan deputat olub. Xalq da ondan razı qalıb. Savadlı, xalqına yanan insandır. Onun kimi adamın yeri həbsxana deyil”.

Bunu Gununsesi.info-ya eksklüziv açıqlamasında əslən Gədəbəydən olan professor Rəşid Mahmudov bildirib.

Nazim Bəydəmirlinin həbsinə toxunan professor deyib ki, onun həbsinin arxasında Söyüdlü sakinlərinin haqlı tələbini dəstəkləməsinin durduğu bildirilir: “Əgər belədirsə, yanlış ediblər. Çünki, Söyüdlü məsələsində hər hansı bir siyasi məqam yoxdur. Bu kəndin sakinləri sağlam yaşamaq istəyir. Sionid zəhərdir. O dövrlərdə kəşfiyyatçılar üzərində gəzdirirdi ki, ələ keçən kimi içib özünü dərhal öldürsün. Nazim Bəydəmirli də haqlı olaraq, o insanlara dəstək verib. Mən ona azadlıq arzu edirəm. Təəssüf ki, məhkəmələrimizdə ədalət yoxdur. Mən onun həbsinə çox üzüldüm. O cinayət törədəcək şəxs deyil”.