Təhsil eksperti Elşən Qafarov Milli Məclisin Elm və təhsil komitəsinin üzvü Etibar Əliyevin sosial şəbəkədə onun haqqında yazdığı ittihamlara, onu “separatçı” adlandırmasına münasibət bildirib.
TEREF.AZ bildirir ki, E.Qafarov Pravda.az-a verdiyi açıqlamada deputatı sərt tənqid edib.

“Deputat Etibar Əliyevin haqqımda yazdığı böhtan və təhqir dolu yazı bir daha onun tərbiyəsindən və davranışından xəbər verir. Milli Məclisdə layiqli, qanunvericiliyini, hakimiyyətini layiqincə təmsil edən onlarla millət vəkillərimiz var. Təsadüfən parlamentə düşən, davranışı, danışığı, əxlaqı ilə təəssüf doğuran tək-tək adamlardan biri də Etibar Əliyevdir. Onun yazdığı tərbiyəsiz yazıya münasibət bildirmək fikrində deyiləm. Amma bir şeyi diqqətə çatdırmaq istəyirəm ki, mən Elşən Qafarov olaraq hələ 17 yaşım yeni tamam olanda Lerikin ucqar dağ kəndindəki evimdən hətta valideynlərimin icazəsi olmadan Ağdamın kəndlərində yerli özünümüdafiə batalyonlarına qoşularaq düşmənə qarşı döyüşmüşəm. Baxmayaraq ki əyani oxuyurdum və şəhid qardaşı idim, iki bronum var idi, bunlardan imtina edərək qardaşımın 40 mərasimini verdikdən sonra yenidən cəbhə bölgəsinə qayıdıb döyüşmüşəm. Bilməlidir ki, separatçılara qarşı ən gənc yaşlarından qəti mübarizə aparan şəxslərdən biriyəm. Etibar Əliyev ən azından bilməli idi ki, hələ o zamanlar Bakıda ayrı-ayrı insanları şantaj edən məqalələr yazan zaman separatçıların ilk həbs etdiyi altı nəfərdən biri mən olmuşam. O vaxtkı mətbuat da bunu yazmışdı. Quru aclıq elan etmişdik. Lənkəran ictimaiyyətinin təzyiqi nəticəsində bizi həbsdən azad etdilər. Separatçı mənbələrdə mənə qarşı olan videolar, yazılar onların öz sosial şəbəkə ünvanlarında hələ də durmaqdadır. Təəssüfedici haldır ki, bu insan qanunverici məclisdə təmsil olunur, onu tanıyanlar haqqında yaxşı bilirlər. Onun yazdığı yazının quruluşu tərbiyəsindən xəbər verir...”, - ekspert deyib.

E.Qafarov Etibar Əliyevin “təhsil sistemindən xüsusi maddə ilə qovulub, adam tam ictimai arenadan silinmişdi, lakin Emin Əmrullayevin mənəvi və maddi dəstəyi ilə son 3 ildən sonra yenidən zühur edib” sözlərinə isə belə cavab verib: “Elşən Qafarovun kim olduğunu təhsil işçiləri çox yaxşı bilirlər. Mənim işdən getməyim şəxsi ərizəmə əsasən olub. Etibar Əliyevin özünə yaraşan üslubda yazıları bir daha göstərir ki, bu insan kimdir. Təkcə indi deyil, illərdir ki, mənə qarşı qərəzli yazılar yazır. Əvvəllər öz adı ilə yox, anonim yazırdı. Bu dəfə cürətlənib, öz adı ilə yazıb. İstənilən halda bu tip insanların təhsil adından danışması, özünü “təhsil eksperti”, “təhsil nümayəndəsi” kimi təqdim etməsi utanvericidir. Digər tərəfdən, bu insan fəlsəfə üzrə fəlsəfə doktorudur, amma bir dəfə də olsun fəlsəfə ilə, yaxud təhsillə bağlı maarifləndirici çıxışları olmayıb. Ordan-burdan köçürdüyü kitabları çıxmaq şərtilə özünü güclü mütaliəçi kimi təqdim edir, amma indiyə qədər ortaya təhsillə bağlı konsepsiya, təklif verən kimi görünməyib. İşi ancaq ayrı-ayrı təhsil müəssisələrinin rəhbərlərini şantaj etmək, tənqid adı ilə təhqir etməkdir. Nəticə etibarilə, bunlar müəyyən “qazanc” əldə etmək məqsədilə görülən işlərdir. Təkrar deyirəm, onun yazdıqları səviyyəsindən, tərbiyəsindən xəbər verir. Elşən Qafarovun necə bir azərbaycanlı, vətənpərvər olduğunu az-çox tanıyanlar bilir. “Youtube” kanalımda, şəxsi səhifələrimdə də keçmişimlə bağlı hər şey ortadadır. Nə etmək olar? İnsandır... Azərbaycan demokratik ölkədir, söz azadlığı var. Çox təəssüf ki, söz azadlığından bu cür sui-istifadə edən şəxslər var. Hətta demokratik vəziyyətdən istifadə edib təsadüfən ölkənin qanunvericilik məclisinə düşən bu tip insanlar da var...”