Murad Sadıxov: “Abşeron” yatağı Azərbaycan qazının ixrac potensialını təxminən 10% artıracaq”
Xəzər dənizindəki “Abşeron” qaz yatağının növbəti fazasının istismara verilməsi Azərbaycan qazının ixrac potensialını təxminən 10 % artıracaq.

İndex.az xəbər verir ki, bunu “Masdar Azerbaijan”ın direktoru Murad Sadıxov Bakıda keçirilən Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında bildirib.

“Abşeron qaz-kondensat yatağı ADNOC-un (Əbu-Dabi Milli Neft Şirkəti) neft və qaz sahəsində ilk beynəlxalq “upstream” layihəsidir və birlikdə nəyə nail ola biləcəyimizin parlaq nümunəsidir. Cəmi bir neçə ildə birgə müəssisə erkən hasilat mərhələsində yüksək əməliyyat göstəriciləri nümayiş etdirib və yatağın növbəti fazasının işə salınmasını sürətləndirir ki, bunun da Azərbaycanın qaz ixracı potensialını təxminən 10 % artıracağı gözlənilir”, – o qeyd edib.

Direktorun sözlərinə görə, bu gün 80 milyard ABŞ dollarından çox məbləğdə aktivləri olan XRG – ADNOC-un beynəlxalq investisiya strukturu diqqəti aşağı karbonlu enerji və kimya sənayesinə cəmləyib, davamlı artımı və innovasiyaların tətbiqini stimullaşdırmağa çalışır.

“Biz karbon izini azaltmaqla eyni zamanda artan enerji tələbini ödəmək üçün miqyaslı, inteqrasiya olunmuş qaz portfelinə investisiya qoymağa sadiqik. XRG SOCAR ilə sıx əməkdaşlıqdan qürur duyur. Tərəfdaşlığımız sayəsində biz ekspertizamızı birləşdirir, infrastrukturu inkişaf etdirir və təbii qaza çıxışı genişləndiririk. Bununla da Xəzər regionunun davamlı inkişafına töhfə verir, regional strategiyanı və enerji təhlükəsizliyini gücləndirir, iqtisadi artımı dəstəkləyirik”, – o əlavə edib.

Xatırladaq ki, 2023-cü ilin avqust ayında ADNOC SOCAR və Fransanın “TotalEnergies” şirkəti ilə “Abşeron” qaz-kondensat yatağında ümumilikdə 30 % iştirak payının alınması haqqında saziş imzalayıb.

Xəzər dənizinin Azərbaycan sektorunda Bakıdan təxminən 100 km cənub-şərqdə yerləşən “Abşeron” yatağını JOCAP – “Absheron Petroleum” birgə əməliyyat şirkəti istismar edib. Yataqdan ilk qaz 2023-cü ilin iyul ayının əvvəlində hasil edilib.