“Bir kanalda ardıcıl olaraq Arif Rəhimzadənin təhqir olunduğunu gördüm. Bu, yol verilməzdir. Ümummilli lider Heydər Əliyevin silahdaşı olan şəxsi təhqir edən şəxs vəzifəsindən getməliydi və getdi də”.

Yenicag.az xəbər verir ki, bu sözləri Azərbaycan Respublikası Prezidentinin İctimai-siyasi məsələlər üzrə köməkçisi-şöbə müdiri Əli Həsənov Azərbaycan Respublikasının Milli Televiziya və Radio Şurası Beynəlxalq Mətbuat Mərkəzində “Azərbaycan ədəbi dilinin qorunmasında və inkişafında KİV-in rolu” adlı tədbirdə çıxışı zamanı deyib.

Prezident köməkçisi telekanallarda təhqirlərə yol verməyin, xoşagəlməz ifadələr işləməyin yolverilməzliyindən bəhs edib:

“Arif Rəhimzadə türk və azərbaycan dilini bir birindən fərqləndirdiyi üçün tənqid atəşinə tutuldu. Lakin o sadəcə identifikasiya aparırdı. Deyir ki, türk dili türk dilidir, azərbaycan dili azərbaycan dilidir. Türkiyə türkiyədir, Azərbaycan Azərbaycandır. Bu ifadələrdən çıxış edərək Arif Rəhimzadə barədə iradlar səsləndirməyə heç kimin haqqı yoxdur.

Televiziyalarımızda türk dilində seriallar verilirdi, biz isə bu serialların yayımlanmamasına qərar verdik. Lazımı qurumlara da izahatımızı verdik. Məsələn, Ukrayna üçün türk dilində serialların verilməməsi dilə heç bir zərər gətirə bilməz. Ancaq rus dilində seriallar Ukraynanın dövlət dili üçün təhlükə yarada bilər. Çünki bu iki dil bir-birinə çox yaxındır. Türk dili və Azərbaycan dili də məhz belədir”.

Qeyd edək ki, Arif Rəhimzadə ilə bağlı sözügedən sujet ATV telekanalında yayımlanıb.

Görünür, ATV-nin sabiq direktoru Vüqar Qaradağlı da məhz bunun qurbanı olduğu üçün istefaya göndərilb.