Fəzail Ağamalı: “Hökumət bunu etmirsə...”; Fazil Mustafa: “Yazıçının titullarının əlindən alınması doğru deyil... ”
Bir müddətdir Rüstəm İbrahimbəyovun ssenari müəllifi olduğu “Qafqaz triosu” filmi mətbuatda, sosial şəbəkələrdə müzakirə edilir, tənqid olunur. Aparılan müzakirələrdə Rüstəm İbrahimbəyovun bu günə qədər aldığı titul və adlarının geri alınması ilə bağlı da fikirlər səslənməkdədir.

Hətta az öncə deputatlardan da bir neçəsi ölkə rəhbərliyinə müraciət edərək yazıçının adlarının geri alınmasını istəmişdi. Lakin hökumət tərəfindən bu müraciətlərə reaksiya verilmədi. O sırada deputat Fəzail Ağamalı da açıqlamalarında bildirmişdi ki, Azərbaycan dövləti tərəfindən Rüstəm İbrahimbəyova verilmiş bütün titullar, fəxri adlar geri alınmalıdır. Çünki artıq R.İbrahimbəyov öz hərəkəti ilə həmin titulları daşımaq haqqını itirib. Necə ki, vaxtı ilə Əkrəm Əylisli oxşar addım atanda onun titulları alınmışdı. Maraqlıdır, hökumət bu müraciətə adekvat reaksiya verə bilərmi?

Fəzail Ağamalı sualımıza cavabında dedi: “Ümumiyyətlə Rüstəm İbrahimbəyov Azərbaycan xalqının iradəsinə, söykənmiş olduğu milli dəyərlərə, dövlətçiliyə qarşıdır, hətta düşmən mövqeyində dayanıb. Bu, artıq bir neçə ildir ki, davam etməkdədir. Mən də buna təmkinli yanaşan insanlardan biri idim, düşünürdüm ki, hisslərini cilovlaya bilmir, vaxtilə böyük bir torpaq sahəsi alıb orada özünə biznes mərkəzi yaratmaq istəyi reallaşa bilmədiyi üçün çox əsəbidir və nəhayət, bu hikkələrə son qoyular. Lakin göründüyü kimi, o, Azərbaycana qarşı mənfi keyfiyyətlərini, niyyətlərini dayandırmaq niyyətində deyil.

Beləliklə, görünür ki, bu adamın içindəki nifrətin həddi-hüdudu yoxdur. O, həmin əsər ilə bütün Azərbaycan xalqını təhqir edib. Erməniləri tamam fərqli bir keyfiyyətdə, biçimdə təqdim edir, azərbaycanlıları isə ermənilərin iddia etdiyi kimi vəhşi, adam öldürən obrazında göstərməyə çalışır.

Mənim bu məsələ ilə bağlı mövqeyim var və səlahiyyətim bununla kifayətlənir. Deputat kimi öz fikrimi parlamentdə bildirir, jurnalistlərin suallarına cavab verdikdə mövqeyimi deyirəm. Azərbaycanda xalqın əksəriyyəti Rüstəm İbrahimbəyovun titullarının geri alınmasına “hə” deyəcək düşüncədədir. İndi bunu hökumət etmir, bizim onun səlahiyyətinə qarışmaq fikrimiz də yoxdur".

Deputat Fazil Mustafa isə qeyd etdi ki, bir yazıçının titul və adlarının geri alınması doğru addım deyil: “Əslində bu cür müraciətlərin edilməsi özü bir qüsurdur. Yaxşı ki, bu müraciətlər nəzərə alınmadı. Çünki hansı formada olursa-olsun, yazarın, filosofun, alimin linç edilmə ənənəsi onlara qarşı təhlükəli bir tendensiyadır. Buna qətiyyən yol vermək olmaz. Rüstəm İbrahimbəyovun əsəri aydın fikirli insanlar tərəfindən zəif, azərbaycanlıları müəyyən dərəcədə aşağılayan bir əsər kimi qəbul edildi. Siyasi motivlə, düşüncə ilə bəraət qazandırmaq istəyən insanlar da oldu, onlar başladılar ki, bu bir kampaniyadır və sairə.


Şəxsən mən filmi izlədikdən sonra mövqeyimi bildirməyə çalışdım ki, burada heç bir kampaniya yoxdur. Açığı, sizə deyim ki, orada problemin çözümünü, doğru niyyəti, azərbaycanlılara yönəlik, onların bu məsələyə yanaşmasının cəmiyyətə doğru çatdırılmasını görmədim. Ssenaridə azərbaycanlı obrazını heç də yaxşı yaratmamış, 2-3 epizod ilə ona zərbə vurmuşdu. O cümlədən, yaşlı adamın öldürülməsi, uşaqların belə bu psixologiyada yaşaması faktının dilə gətirilməsi hər halda əsərin uğursuz istiqamətdə və məqsədyönlü şəkildə olması fikrini verir.

Amma yazıçının əsərinə görə linç edilməsi yanlışdır. Bir yazıçının əsəri xoşumuza gəlməyə bilər, amma cəmiyyətdə xoşa gəlinməyən əsəri nifrət obyektinə çevirmə ənənəsi sovet və ya qədimlərdə avtoritar dövrlərdən qalma bir yanaşmadır. Hesab edirəm ki, bu məsələdə bu cür davranış doğru deyil və yaxşı ki, hökumət tərəfindən hər hansı bir addımlar atılmadı".

Xalidə GƏRAY,
“Yeni Müsavat”