Fərəc Quliyev: “Azərbaycanın və Qərbin bir-birinə indi daha çox ehtiyacı var”; Tural Abbaslı: “Avropanın ən böyük məmuru Bakıya gəldi, demokratiya barədə heç nə demədi”
Son aylarda Qərb mediasından və beynəlxalq təşkilatlardan Azərbaycan hakimiyyətinə qarşı “səlib yürüşü” səngiməkdədir. Avropa mətbuatı və insan haqları təşkilatları mütəmadi olaraq iqtidarı sərt tənqid edir, neqativ motivdə hesabatlar yayırdı. Hakimiyyət insan hüquq və azadlıqlarını boğmaqda, medianın müstəqilliyini buxovlamaqda, siyasi həbslər həyata keçirməkdə ittiham edilirdi.

Bu ilin yanvarından isə Qərb nəşrləri və təşkilatları tənqidlərə ara veriblər. Halbuki “Amnesty İnternational”, “Human Rights Watch”, “Freedom House” kimi beynəlxalq təşkilatlar Azərbaycandakı ictimai-siyasi vəziyyətlə bağlı mütəmadi tənqidi hesabatlar yayırdı.

Müşahidəçilərin fikrincə, hakimiyyətlə Qərb mediası və təşkilatları barışmış kimi görünür. Bu nəticəyə hökumətin yanvardan başladığı müəyyən islahatların, 50-dən çox siyasi məhbusu azad etməsinin təsir göstərdiyi ehtimal edilir. Hətta Avropa İttifaqı rəsmi Bakını əfv fərmanına görə alqışlamışdı. Elə bu günlərdə paytaxtımıza gələn Aİ prezidenti Donald Tuskun prezident İlham Əliyevlə görüşü, Azərbaycan-Aİ əlaqələrinin inkişaf etdiyini söyləməsi göstərdi ki, Qərblə Bakı arasında buzlar xeyli dərəcədə “əriyib”. Həmçinin ABŞ Dövlət Departamenti, Avropa Parlamenti, Avropa Şurası ilə hökumətin münasibətlərinin indi daha mülayim olduğu təsiri bağışlayır.

Deputat Fərəc Quliyev “Yeni Müsavat”a sadalanan faktorların hər birinin ayrı-ayrılıqda reallıq olduğunu qeyd etdi. Onun sözlərinə görə, bu hallar kompleks şəkildə öz təsirini göstərməkdədir. F.Quliyev hesab edir ki, Azərbaycanın və Qərbin bir-birinə indi daha çox ehtiyacı var: “Azərbaycan Qərblə münasibətlərində həm siyasi, həm iqtisadi baxımdan səmimi siyasət aparır. İqtisadi, ticari əlaqələr genişlənir. Azərbaycan Ermənistan kimi riyakar siyasət yürütmür və bunu Qərb dövlətləri, beynəlxalq qurumlar müşahidə edir. Digər tərəfdən, bu münasibətlərin inkişafından tərəflər qarşılıqlı şəkildə qazanır. Azərbaycan Qərb üçün əhəmiyyətli enerji bazarlarından biridir. Təbii ki, ölkədə gedən siyasi-sosial islahatlar, demokratiya səylərinin artırılması da öz təsiri göstərməkdədir”.

Lakin deputat Qərb mediasında Azərbaycanla bağlı qərəzli çıxışların tamamilə kəsiləcəyini düşünmür: “Erməni lobbisi və bizə düşmən dövlətlər işləyir. Amma Qərblə iqtisadi siyasət dövriyyəsində Azərbaycan 50 faiz rəqəmlərlə özünü ifadə edir. Ona görə də Qərb mətbuatında işıqlandırılan, hesabatlarda qeyd olunan məsələlərə artıq əhəmiyyətini itirir. Saxta, yersiz, seleksiya siyasəti ilə üzərimizə gəlmələri azalıb. Amma bu, o demək deyil ki, tamamilə bu hallar kəsilib və bir daha olmayacaq. Sadəcə, Qərbdəki müəyyən dairələr bu yoldan Azərbaycana qarşı təzyiq kimi istifadə etmək istədilər, alınmadı. Çünki təzyiq alətinin rolu kiçilib”.

AĞ Partiya başqanı Tural Abbaslı dünyada fəaliyyət göstərən insan haqları təşkilatlarını və nüfuzlu beynəlxalq media orqanlarını müstəqil hesab eləmir. Partiya sədrinin fikrincə, bu təşkilatlar və mətbu orqanları sadə insanların mövqeyindən çıxış etmir: “Guya ayrı-ayrı dövlətlərdə insan haqlarının məhdudlaşdırılması ilə bağlı hesabatlar hazırlayırlar. Əslində həmin təşkilatlar Qərbdəki dövlətlərin maraqlarına xidmət edir. Belə təşkilatların səmimiyyətinə heç zaman inanmamışam”.

T.Abbaslının sözlərinə görə, sadəcə, təsir rıçaqlarını və kompromatları təşkil etmək üçün vaxtaşırı hesabatlarla çıxış edirlər: “Avropanın ən böyük məmuru Bakıya gəldi, ölkənin irəlilədiyini fəxrlə bildirdi. Donald Tusk demokratiya, azad seçki, sərbəst toplaşma azadlığı barədə heç nə demədi. Mən ”ümumbəşər dəyərlərin keşikçisi" kimi özünü təqdim edən bu qüvvələrin səmimiyyətinə inanmamağa çağırıram. Hər bir xalq öz müqəddəratını özü həll etməlidir".

Emil SALAMOĞLU,
“Yeni Müsavat”