Xəbər verdiyimiz kimi sentyabrın 27-də “Laçın” dövlət sərhədindən buraxılış məntəqəsində Dövlət Sərhəd Xidmətinin hərbi qulluqçularının sayıqlığı nəticəsində ölkə ərazisinə qeyri-qanuni gələrək qondarma rejimin “dövlət naziri” vəzifəsində çalışmış 1968-ci il təvəllüdlü Ruben Karleni Vardanyan Azərbaycan Respublikasından Ermənistan istiqamətində hərəkət edərkən saxlanılıb.

Nəzərə alaq ki, erməni milyarder 2022-ci ilin sentyabrında qeyri-qanuni yolla Qarabağa gəlib və separatizmin güclənməsinə öz dəstəyini verib.

Məsələ ilə bağlı fikirlərini Bizim.Media ilə bölüşən sabiq xarici işlər naziri Elmar Məmmədyarov bildirdi ki, bu hadisə Azərbaycan dövlətinin qətiyyətinin göstəricisidir:


“Vardanyan separatçıdır. Pozucu qüvvələrin başında dayanırdı. O, Xankəndinə gələndə bəyan etmişdi ki, “Artsax”ın müstəqilliyinə nail olmaq üçün gəlib. Hətta bu məqsədlə xüsusi fond da yaratmışdı. Bir ara separatçıların başında dayandı.

Yəni Vardanyanı həbsə atmaq üçün Azərbaycan dövlətinin əlində kifayət qədər hüquqi əsaslar var. Separatçının saxlanılması bir daha sübut edir ki, Azərbaycan dövləti onun suverenliyinə və ərazi bütövlüyünə dil uzadan hər kəsə qarşı amansız olacaq”.