Putin paytaxt Moskvada hökumət rəsmiləri ilə görüşündə ölkənin sentyabrın 21-dən qüvvəyə mindiyi benzin və dizel ixracı qadağasını dəyərləndirib.

32gun.az xəbər verir ki, prezident yanacağın qiymətinin artmasına görə hökuməti tənqid edib.

Yanacaq ixracına qadağa qoyulmasına baxmayaraq Rusiyada qiymətlərin artmağa davam etdiyini bildirən Putin, "Tədbirlər alındı, amma pərakəndə qiymətlər artır. Lakin istehlakçının nəticəyə ehtiyacı var. Hadisələrə daha tez reaksiya vermənizi istəyirəm",- deyib.

İxrac qadağasının nəticə verəcəyinə ümid etdiyini vurğulayan prezident “Sizinlə danışdığımız kimi şirkətlərlə daha yaxından işləmək lazımdır ki, məsuliyyətlərini dərk etsinlər. Yanacağın qiymətinin aşağı salınması üçün əlavə tədbirlər görüləcək”,-deyə fikirlərinə əlavə edib.

Digər tərəfdən, iclasda çıxış edən Rusiya Baş nazirinin müavini Aleksandr Novak daxili bazar üçün istehsal edilən, lakin yüksək gəlir gözləntiləri ilə ixrac edilən neft məhsullarına əlavə vergi tətbiq etməyi planlaşdırdıqlarını vurğulayıb. O, neft emalı zavodlarına verilən subsidiyaları da nəzərdən keçirdiklərini bildirib.