İsrailin Baş naziri Benyamin Netanyahu bazar günü BMT-ni sülhməramlılarını Livanın cənubundakı “zərər yolundan” çıxarmağa çağıraraq, Hizbullah yaraqlılarının İsraillə davam edən döyüşlərdə onlardan “insan qalxanı” kimi istifadə etdiyini iddia edib.

Cümə axşamından bəri baş verən üç ayrı insidentdə beş sülhməramlının yaralanmasından sonra İsrail lideri BMT-nin baş katibi Antonio Quterreşə deyib ki, “BMT-nin qüvvələrini “Hizbullahın qalalarından və döyüş bölgələrindən çıxarmağın” vaxtı çatıb.

“Sizin (BMT) əsgərlərini təxliyə etməkdən imtina etməyiniz onları Hizbullahın əlində girov edir. Bu, həm onları, həm də əsgərlərimizi təhlükə altına qoyur”, Netanyahu bildirib.

Nazirlər Kabinetinin iclasından əvvəl danışan Netanyahu “Biz (BMT) əsgərlərinə dəyən zərərə görə üzr istəyirik və bu zərərin qarşısını almaq üçün əlimizdən gələni edirik. Ancaq bunu təmin etməyin sadə və aşkar yolu onları sadəcə olaraq təhlükə zonasından çıxarmaqdır”deyib.

Birləşmiş Millətlər Təşkilatının Livandakı Müvəqqəti Qüvvələri (UNIFIL) şənbə günü qoşunlarını köçürməkdən imtina edib.

Bazar günü BMT-nin Ramyahdakı mövqeyində olan sülhməramlılar üç dəstədən ibarət İsrail əsgərinin Livana keçdiyini müşahidə etdiklərini bildiriblər. Sülhməramlıların sığınacaqlarında olduğu BMT missiyası bildirib ki, iki İsrail tankı mövqenin əsas qapısını dağıdıb və mövqeyə zorla daxil olub.

Tanklar UNIFIL-in İsrailə etirazından təxminən 45 dəqiqə sonra ərazini tərk edib.

Netanyahu deyib ki, İsrail BMT-dən hər iki ölkəni ayıran “Mavi Xəttdən beş kilometrə qədər” mövqelərdən geri çəkilməyi xahiş edib, lakin sülhməramlılar bundan imtina ediblər. Bu, onun Livanın cənubundakı 29 mövqeyini əhatə edir.

Müxtəlif ölkələrdən olan təxminən 9500 əsgərdən ibarət UNIFIL-in missiyası İsrailin 1978-ci ildə Livana təcavüzündən sonra yaradılıb. Hazırda missiyaya İsrail və Hizbullah arasında 2006-cı ildə 33 günlük müharibəyə son qoyan atəşkəs rejiminə nəzarət etmək tapşırılıb.