Demokratik qanunvericilər ABŞ Konqresinin hər iki palatasında məhdud siyasi kapitala baxmayaraq, dəyişikliklərə qarşı çıxacaqlarına söz verərək, Tramp administrasiyasının ABŞ hökumətini yenidən formalaşdırmaq üçün "ifrat" səylərini tənqid edib.

Nümayəndələr Palatasında Demokratlaın lideri Hakim Ceffries deyib ki, Respublikaçılar ABŞ hökumətini yenidən formalaşdırmaq üçün mühafizəkar layihə olan Project 2025-ə əməl etməyəcəkləri ilə bağlı verdikləri kampaniya vədindən ayrılırlar.

"Bu il Respublikaçılar bütün vaxtlarını Project 2025-in ən ekstremal hissələrini həyata keçirməyə sərf edir və yüksək yaşayış xərclərini azaltmaq üçün heç bir iş görmür" - deyə, Ceffries bildirib.

Konqresdəki Respublikaçılar Trampın dövlət qurumlarını yenidən qiymətləndirmək üçün geniş prezident səlahiyyətlərindən istifadə etdiyini deyirlər. Tramp bunu Hökumətin Səmərəliliyi Departamentinə və ya məqsədi federal xərcləri azaltmaq olan DOGE-yə rəhbərlik etdiyi multimilyarder İlon Mask vasitəsilə həyata keçirir.

Senatda azlıqların lideri Çak Şumer həmkarlarına yazdığı məktubda Demokratların Tramp administrasiyasının hərəkətlərinə qarşı çıxmaq üçün dörd istiqamətli strategiyaya sahib olduqlarını yazıb: nəzarət, məhkəmə çəkişmələri, qanunvericilik, ünsiyyət və səfərbərlik.

Şumer həmçinin Demokratların maliyyənin dondurulmasını dayandırmaq və federal işçilərin işdən çıxarılmasının qarşısını almaq üçün məhkəmələrdə iddiaları dəstəkləməyə davam edəcəklərini deyib.

Vitse-prezident JD Vans həmin məhkəmə qərarlarını tənqid edərək X-də yazıb: “Əgər hakim generala hərbi əməliyyatı necə aparacağını söyləməyə çalışsa, bu, qanunsuz olardı. Əgər hakim baş prokurora prokuror kimi öz mülahizəsindən necə istifadə etməyi əmr etməyə çalışırsa, bu da qanunsuzdur. Hakimlərin icra hakimiyyətinin qanuni hakimiyyətinə nəzarət etməsinə icazə verilmir”.

Demokrat senator Kris Merfi X-də cavab verib: “Konstitusiya böhranının ortasında olduğumuza inananlar üçün bu, onun məğzidir. Tramp və Vans nəzarətsiz icra hakimiyyətinə qarşı demokratiyanın son müdafiə xətti olan məhkəmələrə məhəl qoymamaq üçün zəmin yaradırlar”.

Senat Demokratları həmçinin federal dövlət işçiləri və dövlət qulluqçuları üçün qanun pozuntuları haqqında məlumatı açıqlamaq üçün yeni məlumat verənlər portalı elan edib.

“Senat Respublikaçıları İcra Hakimiyyətinə nəzarəti təmin etmək üçün konstitusiya vəzifələrini yerinə yetirməkdən imtina etdikcə, Senatın Demokratları həqiqəti üzə çıxarmaq öhdəliyimizə sadiq qalırlar. Biz tələb məktubları verməyə, ictimai qeydləri qorumağa, ictimai dinləmələr keçirməyə və zəruri hallarda hüquqi tədbirlər görməyə hazırıq”, Demokratların bəyanatında deyilir.

Şumer Demokratların ABŞ hökumətini maliyyələşdirən qanunvericiliyi dəstəkləyəcəyini desə də, Respublikaçıları ikitərəfli qaydada danışıqlar aparmağa çağırıb.

ABŞ hökumətini maliyyələşdirən qısamüddətli qətnamənin müddəti martın 14-də başa çatır. Həmin tarixdən keçmiş hökuməti maliyyələşdirən hər hansı qanun layihəsinin qəbul edilməsi üçün ABŞ Senatında 60 səs lazımdır. Respublikaçılar hazırda 53 yerlə palatada çoxluq təşkil edir.