Ərəb Liqasının Baş katibi Əhməd Əbül Qeyt çərşənbə günü fələstinlilərin Qəzza zolağından köçürülməsi ilə bağlı istənilən planı rədd edib və belə bir məskunlaşdırmanın “qəbuledilməz” olduğunu bildirib.

Əbül Qeyt Dünya Hökumətlər Sammitində çıxışı zamanı ABŞ prezidenti Donald Trampın müharibədən dağılmış Qəzzadan təxminən 2 milyon fələstinlinin köçürülməsi təklifinin bölgəni “sülh və sabitliyə zərər verəcək” böhranlara sürükləyəcəyini deyib.

İordaniya Kralı II Abdulla çərşənbə axşamı Tramp ilə apardığı danışıqlarda ölkəsinin Qəzza və İordan çayının qərb sahilində fələstinlilərin köçürülməsinə qarşı “dəyişməz mövqeyini” ifadə etdiyini bildirib.

“Fələstinliləri köçürmədən Qəzzanın yenidən qurulması və ağır humanitar vəziyyətin həll edilməsi hamı üçün prioritet olmalıdır,” – deyə Abdulla X platformasında yazıb.

O, həmçinin Trampın Qəzzada atəşkəsin əldə olunmasında vacib rol oynadığını qeyd edib və ABŞ-ı, eləcə də bütün tərəfləri döyüşlərin dayandırılmasının qorunmasına çağırıb.

Tramp, ABŞ-ın Qəzzanı idarə edəcəyi və fələstinlilərin geri qayıtmaq hüququnun olmayacağı bir plan haqda danışıb. Regiondakı digər ölkələr, o cümlədən Misir və Səudiyyə Ərəbistanı isə bu ideyanı rədd edib.

Qəzza müharibəsi 2023-cü ilin oktyabrında HƏMAS-ın İsrailə hücumu ilə başladı. Bu hücum nəticəsində 1,200 nəfər həlak oldu və 250 girov götürüldü. İsrailin əks-hücumu nəticəsində isə yerli səhiyyə qurumlarının məlumatına görə, yarısından çoxu qadın və uşaq olmaqla 48,200-dən çox fələstinli həyatını itirib. İsrail bu rəqəmin 17,000-nin döyüşçü olduğunu iddia edir.