Rusiya Xarici İşlər naziri Sergey Lavrov Vladimir Putinin xüsusi nümayəndəsi Kirill Dmitriyevi heç cür “həzm edə” bilmir.

“AzPolitika” xəbər verir ki, Rusiyanın “Agentlik” layihəsi Lavrovla Dmitriyevin münaqişədə olduğuna dair maraqlı özəl məlumat yayıb.

Qeyd olunur ki, Vladimir Putinin Səudiyyə Ərəbistanına ABŞ-nin yüksək vəzifəli təmsilçilərilə görüşə göndərdiyi nümayəndə heyətində qalmaqal yaşanıb. “Agentlik” öz mötəbər mənbələrinə istinadla bildirir ki, görüş zamanı Lavrovla Dmitriyev amerikalıların gözü qarşısında stul üstündə dava ediblər.

Nəşrin məlumatına görə, əvvəlcə Səudiyyə Ərəbistanına Sergey Lavrov və Putinin köməkçisi Yuri Uşakovun uçması planlaşdırılırdı. Lakin Putin qəfildən xüsusi nümayəndəsi Kirill Dmitriyevi də nümayəndə heyətinə qatıb və Lavrova bu barədə xəbərdarlıq edilməyib.

Nəşrin yazdığına görə, Lavrov bundan hiddətlənib və Dmitriyevə danışıqlar zalında stul verməkdən imtina edib. Amerikalılar buna çaşqınlıqla baxıblar.

Mənbələr bildirib ki, Lavrov onun stulunu masanın yanından itələyərək deyib: “Əgər o (Dmitriyev) iştirak etmək istəyirsə, bu barədə mənə şəxsən Vladimir Vladimiroviç məlumat versin”.

Bundan sonra Dmitriyev zalı tərk edərək jurnalistlərlə söhbət etmək üçün dəhlizə çıxıb. Həmin gün görüşlə bağlı fotolardan da görünürdü ki, nümayəndə heyətinin tərkibində olmasına baxmayaraq, Dmitriyev ameriaklılarla görüşdə masa arxasında yoxdur, əvəzində, dəhlizdə Qərb mətbuatına açıqlama verir.

Belə görünür ki, Lavrovun riyakar, yalançı, saxtakar eqosu Putinin heç bir diplomatik təcrübəsi olmayan Dmitriyevi qabağa verməsinə qısqanclıqla yanaşır. Lakin ona qarşı nəsə etməyə də acizdir. Çünki Dmitriyev Lavrovdan fərqli olaraq, “ailənin adamı” sayılır. Məlum olduğu kimi, o, Putinin qızının rəfiqəsinin əridir və Dmitriyevin böyük bir dövlət fonduna rəhbərlik etməsi, daha sonra isə ABŞ ilə strateji əhəmiyyətli danışıqalrda Putini təmsil etməsi də bundan irəli gəlir.


“Agentlik” isə yazır ki, Rusiya nümayəndə heyətində düşən “stul davası”nın kökündə Putinin yaramaz idarəçiliyi durur: "Hamı bir-bir Putinin yanına gedir və o, hamıya fərqli şeylər deyir. Danışıqlar zamanı heç kimin Rusiyanın tələblərini konkret şəkildə formalaşdıra bilməməsinin səbəblərindən biri də budur".