Rusiya prezidenti Vladimir Putin mülki obyektlərə zərbələrdən imtina mövzusunu məhz Ukrayna tərəfi ilə müzakirə etməyə hazırdır.
Bu barədə Kremlin mətbuat katibi Dmitri Peskov TASS-a açıqlamasında bildirib.

“Prezident mülki obyektlərə zərbələrin endirilməməsi mövzusunu, o cümlədən ikitərəfli şəkildə müzakirə etməyin mümkünlüyündən danışarkən məhz Ukrayna ilə danışıqları nəzərdə tuturdu”, – deyə Peskov vurğulayıb.

O əlavə edib ki, prezident Putin dəfələrlə Ukrayna ilə danışıqlara hazır olduğunu bəyan edib. Mülki obyektlərə zərbələrdən imtina məsələsi isə bu istiqamətdə Putinin daha bir təklifi kimi təqdim olunub.

Bundan öncə Peskov Vaşinqtondan gələn və Ukraynanın NATO üzvlüyünün istisna olunduğunu bildirən xəbərləri də şərh etmişdi. O, bu qərarın Moskvanı qane etdiyini deyərək vurğulayıb ki, bu yanaşma Rusiyanın mövqeyi ilə üst-üstə düşür. Peskovun sözlərinə görə, Ukraynanın NATO-ya mümkün üzvlüyü münaqişənin əsas səbəblərindən biridir.

Xatırladaq ki, ABŞ-də Ukrayna ilə bağlı kompromis təklifləri irəli sürülüb və münaqişənin həlli üçün güzəştə getmək tövsiyə olunub.