İşğal olunmuş Krımın hakimiyyət orqanları Müdafiə Nazirliyi ilə müqavilə bağlamış ruslara ölkədə qeydiyyatdan və yaşayış yerindən asılı olmayaraq yarımadanın hərbi komissarlıqları vasitəsilə pulsuz torpaq sahələri verməyə başlayacaq.

İqtisadiyyat.az xəbər verir ki, bu barədə yerli mənbələr məlumat yayıb.

"Vətəndaşlar Rusiya Federasiyasının ərazisində qeydiyyatdan və yaşayış yerindən asılı olmayaraq, qəbul edilmiş dəyişikliklər qüvvəyə mindikdən və hərbi komissarlıqda və ya hərbi xidmətin seçilməsi məntəqələrində müqavilə bağladıqdan sonra, Rusiya Federasiyasının Krım bölgəsində torpaq sahəsi almaq imkanına malikdirlər", - deyə məlumatda deyilir.

Qeyd edilib ki, yerli özünüidarəetmə orqanlarında torpaq sahəsi gözləyən vətəndaşların əlavə torpaq almaq hüququ yoxdur. Yarımadada müharibədə iştirak etmək üçün artıq torpaq almış şəxslərə torpaq verilməyəcək.

Əvvəllər Krımda yalnız yarımadanın sakinləri torpaq ala bilərdi.