Emin Ağalarova məxsus olduğu deyilən “Nardaran İnvest” MMC ilə bağlı cərimə protokolu tərtib edilib.

Tribunainfo.az xəbər verir ki, MMC-nin İnzibati Xətalar Məcəlləsinin gömrük qaydaları əleyhinə olan 485.2-ci maddəsini pozduğu məlum olub. Tələbi pozulan maddəyə əsasən, Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə, vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir.

“Nardaran İnvest”lə bağlı iş baxılması üçün Nəsimi rayon məhkəməsinə göndərilib. 24 oktyabr tarixində hakim Anar İbadzadənin sədrliyi ilə işə baxılacaq.

Qeyd edək ki, “Nardaran İnvest” MMC-nin Azərbaycanın Xalq artisti Emin Ağalarova məxsus olduğu bildirilir. Ötən il Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi “Nardaran İnvest” MMC-yə Emin Ağalarova məxsus “Sea Breeze” istirahət zonasının ərazisində yaşayış binasının tikintisinə icazə vermişdi. Həmçinin sözügedən MMC “Sea Breeze”də 2 ədəd 5, 3 ədəd 6 mərtəbəli yaşayış binası da tikir.

Tərəfləri dinləməyə hazırıq.