Hər iki valyutada ölkənin Qısamüddətli EDR-ləri “F3” səviyyəsində saxlanılıb.
“Fitch Ratings” beynəlxalq reytinq agentliyi Azərbaycanın milli və xarici valyutada uzunmüddətli emitent defolt reytinqini (EDR) “BBB-” səviyyəsində təsdiqləyib. Bu barədə RİA Novosti xəbər yayıb.
Agentliyin açıqlamasında bildirilir ki, ölkənin proqnozu "stabil" kimi qiymətləndirilir.
Hər iki valyutada ölkənin Qısamüddətli EDR-ləri “F3” səviyyəsində saxlanılıb və Ölkə Tavanı “BBB-” səviyyəsində təsdiq edilib.
“Azərbaycanın reytinqləri onun çox güclü xarici balansını, həmyaşıdları qrupunda dövlət borcunun ən aşağı səviyyəsini və iri suveren fondun aktivləri vasitəsilə maliyyələşdirmə çevikliyini əks etdirir”, - agentlik öz qərarını şərh edir.

Qeyd olunur ki, güclü tərəflər karbohidrogenlərdən yüksək asılılıq və geosiyasi risklər kimi mənfi amillərlə kompensasiya olunur.
Fitch hesab edir ki, neft hasilatının daha yavaş azalması səbəbindən ölkənin iqtisadi artım tempi 2024-cü ildə 4,1%-ə yüksəlib.
Eyni zamanda, 2025-ci ildə ÜDM-in artımının 3%-ə, 2026-cı ildə isə 2,4%-ə qədər azalacağı proqnozlaşdırılır.
Analitiklər illik inflyasiyanın bu il orta hesabla sürətlənərək keçən ilki 2,1%-dən 5,3%-ə çatacağını gözləyirlər ki, bu da “BBB” reytinqinə malik ölkələr üçün 3%-lik medianı üstələyir.