RİA Novosti: Rusiyanın Aİ-yə qaz satışından əldə etdiyi gəlir yanvar-noyabr aylarında 7,9% azalıb.
Rusiyanın yanvar-noyabr aylarında Avropa ölkələrinə qaz satışından əldə etdiyi gəlir 2023-cü ilin eyni dövrü ilə müqayisədə ümumilikdə 7,9% azalıb.
Bu barədə "RİA Novosti" Avropa Statistika Xidmətinin (Eurostat) məlumatlarına istinadən xəbər verir.
Hesabat dövründə Avropa ölkələri Rusiyadan ümumilikdə 6,7 milyard avro dəyərində boru kəməri ilə qaz alıblar. Məbləğin 20%-i Slovakiyanın payına düşür. Bu ölkə Rusiyadan 1,2 milyard avro dəyərində yanacaq alıb.
Cümə günü məlum olub ki, Slovakiya ötən ilin noyabrında Rusiyadan ümumilikdə 151,2 milyon avro dəyərində təbii qaz alıb ki, bu da 2023-cü ilin fevralından bəri ən yüksək göstəricidir.
"Kpler" şirkətinin topladığı statistik məlumatlara istinadən bəzi qəzetlər qeyd ediblər ki, Ukrayna ərazisindən tranziti dayandırıldıqdan sonra Avropa İttifaqı (Aİ) ölkələri Rusiya qazını rekord sürətlə satın alır.