Xəbər verdiyimiz kimi, İran, İraq və İsrailin hava məkanında tətbiq edilən məhdudiyyətlər səbəbindən iyunun 13-də səhər saatlarında Bakıya 10-dan çox təyyarə enib.
Onların arasında Moskva, Minsk, Kazan və digər yerlərdən Dubaya uçuşlar olub. Bu reyslərdə olan sərnişinlər arasında BƏƏ-yə səfər edən erməni əsilli və erməni soyadlı vətəndaşlar da var.

Məsələ ilə bağlı, habelə hadisə baş verəndən nə qədər təyyarə qəbul etdiyimizlə əlaqədar Ajans.az AZAL-a sorğu ünvanlayıb.

Sorğuya cavab olaraq bildirilib:

“Yaxın Şərq hava məkanında tətbiq olunan məhdudiyyətlər fonunda bu gün 13 beynəlxalq aviaşirkət Heydər Əliyev Beynəlxalq Aeroportunu ehtiyat eniş məntəqəsi kimi seçib.

Eyni zamanda, 50-dən artıq reys marşrutunu dəyişərək məhz Azərbaycan hava məkanından keçidi üstün tutub. Hər iki proses fasiləsiz və təhlükəsizlik prinsiplərinə uyğun şəkildə həyata keçirilib. Bu da bir daha sübut edir ki, Azərbaycan infrastrukturu, koordinasiya imkanları və operativ çevikliyi ilə regionda sabit hava nəqliyyatının təminatçısıdır”.