ABŞ-ın Türkiyədəki səfirliyi martın 1-də Ankaradakı vətəndaşlarına terrorla bağlı xəbərdarlıq edib.

Axar.az xəbər verir ki, yerli mediada yayılan məlumatlara görə, səfirliyin saytında sadəcə ingilis dilində olan bölmədə yerləşdirilən xəbərdarlıqda paytaxtın Anıtqəbir və Baxçalievlər ərazisində terror təhlükəsi gözlənildiyi qeyd olunub.

Bu səbəbdən səfirlik vətəndaşlarına xəbərdarlıq edərək, həmin ərazidən mümkün qədər uzaq olmalarını məsləhət görüb. Məlumatda terror hadisəsinin baş verə biləcəyi binalar da göstərilib. Onların sırasında Anıtqəbir, Milli Kitabxana, Quru Qoşunları Komandanlığı, Xaricli İşlər, Sosial Müdafiə və İqtisadiyyat Nazirliyinin binası da var.

Bu xəbərdarlığın səfirliyin saytında yalnız ingilis dili bölməsində yayımlanması müzakirələrə səbəb olub.

Xatırladaq ki, Qızılay meydanı yaxınlığında baş verən partlayış nəticəsində 27 nəfər ölüb, 75 nəfər yaralanıb.