Tofiq Yaqublu ilə Gülağa Aslanlı arasında mübahisə - "SAXTA ARAYIŞ" QALMAQALI

23-11-2019, 00:00           
Tofiq Yaqublu ilə Gülağa Aslanlı arasında mübahisə - "SAXTA ARAYIŞ" QALMAQALI
Müsavat Partiyasının başqanlığına namizəd olmuş partiya üzvü Tofiq Yaqublu hazırkı başqan Arif Hacılı və partiyanın İcra Aparatının rəhbəri Gülağa Aslanlını mühacirlərə saxta arayış verilməsi ilə bağlı ittiham edib.

APA-nın məlumatına görə, bu barədə Tofiq Yaqublu özünün "Facebook" səhifəsində yazıb.

T.Yaqublu qeyd edib ki, 2016-cı ildən partiya rəhbərliyindən mühacirlərə verilmiş arayışlarla tanış olmaq üçün imkan yaradılmasını tələb edib, ancaq buna imkan verilməyib: "Hörmətli başqan Arif Hacılı canlı yayımların birində dedi ki, partiya üzvü yazılı ərizə ilə müraciət etsə, ona həmin arayışlarla tanış olmaq imkanı yaradılacaq. Bundan dərhal sonra Mərkəzi İcra Aparatının rəhbəri Gülağa Aslanlının adına bir ərizə də yazdım, lakin heç xeyri olmadı və bildirilən 197 arayışla tanış olmaq imkanı yaradılmadı. Divan üzvü, başqan müavini olmağım da yetərli olmadı. Baxın, hüququm ola-ola və partiyanın da mənə həmin şəraiti yaratmasına borclu olmasına baxmayaraq, 3 il ərzində həmin arayışları mənə göstərmədilər, amma canlı yayımda səsləndirdiyim fikirdən yapışaraq, elə ertəsi günü məndə olan sübutları onlara təqdim etməyi tələb edirlər. Bilə-bilə ki, mənim həmin sübutu lazım bildiyim qədər özümdə saxlamaq və mənbəyini aşkarlamamaq hüququm var. Heç narahat olmayın, özüm münasib bildiyim şəkildə və şəraitdə nə lazımdırsa açıqlayacam. Siz hələ ortada olan suallara cavab verin".

T.Yaqublu bildirib ki, AKM Müsavat Partiyasının strukturudur, onun rəhbərliyinin təşkilatçılığı və tapşırığı əsasında yaradılıb: "Nizamnaməsi partiyada hazırlanıb və təşkilatın yaradılması prosesi Divanın nəzarətində olub. Bu illər ərzində Bakıdan idarə olunub. Sadəcə olaraq, rəsmi qeydiyyatdan keçən zaman Almaniya qanunlarının onu partiyanın Avropa strukturu kimi qeydə alınmasına imkan vermədiyinə görə QHT kimi qeydiyyatdan keçirməyə məcbur oldular. İndi də bu QHT faktorundan yapışaraq, AKM-in Müsavat Partiyasına aidiyyətli olmadığını deyirlər. Sanki biri pulunu verib ev alıb, uzun müddətdir ki, içində yaşayır və hansı səbəbdənsə onu öz adına rəsmiləşdirə bilməyib, yaxın qohumunun adına yazdırıb. Ortaya problem çıxanda da evin ona aid olmadığını deyir".

Partiyanın İcra Aparatının rəhbəri Gülağa Aslanlı isə Tofiq Yaqublunun iddialarına cavab verib.

G.Aslanlı bildirib ki, Tofiq Yaqublu müsavatçılara yanlış məlumat verir: "Partiya sənədləri ilə 3 il ərzində tanış olmaq istəsəm də, tanış ola bilməmişəm - ifadəsini işlətməklə bu məsələni şişirtməyə cəhd edirsiniz. Sizin arayışlarla tanış olmaq istəyiniz haqqında müraciətiniz bu ilin avqust ayında olub. Mən də sizə hansı sənədi şübhəli bilirsənsə, onu söylə, birlikdə baxaq demişəm. Arayış verilən şəxslərin açıqlanmasını, onları ailə üzvlərinin təzyiqə məruz qala bilməsi və bir çox diğər səbəblərdən ictimailəşdirmək fikrimin olmadığını dəfələrlə söyləmişəm. Siz isə bu vaxta qədər Müsavat Partiyası ilə əlaqəli olan yalnız bir sənəd ortaya qoymusunuz ki, onuncu cavabı verilib. Müsavat AKM barədə də iki sorğunuz olub və hər ikisinə aydınlıq gətirməyə çalışmışam. İlham Həsən barəsində "o, sənəd alveri edir" iddasını siz irəli sürsəniz də, heç bir fakt ortaya qoya bilməmisiniz. Əgər kiminsə şifahi və yazılı bəyanatını əldə rəhbər tutmaq fakt hesab olunursa, onda ilk dəfə belə məlumat Siz həbsdə olan zaman Elnur Mirzə tərəfindən Sizin haqqınızda deyilib və mənim tərəfimdən təkzib olunub. Özünüz də bu barədə həbsdən çıxandan sonra qəzetlərin birinə müsahibə verərkən danışıb, partiyanın bu istiqamətdəki fəaliyyətini tərifləmisiniz.

Sizə sənədi ötürən mənbə mənə maraqlı deyil, onu soruşmuram. Sənədi təqdim edin, birlikdə araşdırın. Ya da hüquq mühafizə orqanlarına təhvil verin".












Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.