Nazirlər Kabineti yanında yaradılmış Operativ Qərargah hazırkı sanitar-epidemioloji vəziyyətə uyğun olaraq, sərt karantin rejiminin mövcud olduğu şəhər və rayonlarda, eləcə də ölkə üzrə bəzi yumşalmaların tətbiqinə qərar verildi. Ancaq qərar açıqlanandan sonra bəlli oldu ki, 5 avqustdan sonra yalnız iki qadağa aradan qaldırılacaq - sms icazə sistemi ləğv ediləcək, çimərliklərə girişə icazə veriləcək.
Təbii ki, ancaq iki qadağanın aradan qaldırılması cəmiyyət tərəfindən çox aqressiv qarşılandı, əksər insanlar sosial şəbəkələr vasitəsilə bu duruma öz etirazlarını bildirdilər. Bir sözlə, OQ-nin bugünki qərarını tənqid edənlər də oldu, lağlağı obyetktinə çevirənlər də. Həmçinin pandemiya ilə bağlı xarici ölkələrin təcrübəsini missal göstərənlər də.
Dominant.az tanınmış jurnalistlərin məsələ ilə bağlı fikirlərini təqdim edir:
Aygün Muradxanlı: “31 avqust nədir? Vətəndaş necə yaşasın, nəylə yaşasın? 6 ay dünyanın harasında karantin oldu? Gündə COVID-dən 600-700 ölüm olan ölkələr belə, normal həyata dönüb. 5-6 ölüm faktına görə ölkəni niyə iflic edirlər ki? İqtisadi enişi dərin böhrana çevirən bu qərarlar kimin başının altından çıxır?”.
Əzizə İsmayılova: “Əslində, dəyişən bir sms-in ləğvidir, bir də çimərliyin açılması. Başqa hər şey necə varsa, eləcə də qalır. Çimərlik üçün portal filan da yaradılıb. Amma bu gün ayın 3-dür. Ay sonuna 27 gün qalır. Bunun da həftə sonları sərt karantin, 3 günü yağış, 2 günü külək... Çox olsa, getdik 3, ya 4 dəfə. Buna görə əziyyət çəkməyin adı nə idi? Bunun nəyi yumşalmadır? Bu qədər işsiz insanlar var. Necə olacaq bunların axırı? Necə qarşılayacaqlar bu qədər tələbatı? Ac millətə çıxıb necə şad xəbər demək olar ki, "çimərlik istəyirdiniz, al, bu da çimərlik. Ac qarına o sən, o dəniz. Pul tapsan gedərsən". Nə bilim vallah, rəsmən həyatımız həbsə atılıb, oyalıya-oyalıya gedirik. Yenə mənim adım qalacaq "loo xəbər", yenə millətin qarğışı, nifrəti göydə oynayacaq...”.
Aynur İmran: “Xalqla belə davranmaq olmaz! 5 ay karantin olmaz! İnsanların maddi təminatını həll etmədən, nə yeyəcəyini, kirasını, dərmanlarını necə ödəyəcəyini təmin etmədən evə tıxmaq olmaz! Niyə həkimlərin və iqtisadçıların birləşdiyi bir şura qurulmur? Niyə xalqın ehtiyacları düşünülmür? Bu qərar fiaskodur. Təcili yeni addımlar atılmalı, vətəndaşların təminatı ehtiyaclar real şəkildə nəzərə alınaraq həyata keçirilməlidir. Türkiyədən tibbi anlamda kömək istənməlidir. Yoxsa, bu karantin cəmiyyətdə partlama yaradacaq. Bu ölkənin suverenliyini təhlükəyə atmaq üçün ölkədəki xarici güclərin əlinə fürsət verməkdir. Bir problemdən doğan onlarla problemi də düşünmək zorundasınız. Bu qədər səriştəsizlik, etinasızlıq, saymamazlıq sizin özünüzü də batıracaq”.
Aqil Ələsgər: “Əslində, hər nə qədər OQ qərarı deyilsə də, açıq şəkildə bunun TƏBİB qərarları olduğu görünür. Elə Türkiyədə də hər şeyi Fəxrəddin Qocaya buraxsaydılar, onlar da hələ də bizim kimi karantində jim vururdular. Burada siyasi iradə və iqtisadiyyatı düşünən beyinin öz sözünü artıq deməsi lazımdır. Necə ki, Türkiyədə məhz bir çox qadağaları Ərdoğan Fəxrəddin Qocaya rəğmən etdi. Çünki dövləti ayaqda tutmaq üçün müəyyən riskləri göz önünə almaq vacibdir. OQ qərarları bəlkə də hardasa və nisbətən sağlamlığımıza xidmət edir. Ancaq iqtisadiyyat çökür. Həm şəxsi, həm də dövlət iqtisadiyyatı məhv olur. Evdə oturub, "Allahdan buyruq, ağzıma quyruq" deyənlər üçün asan gələ bilər, bu yükə çiyin verənlərin belini qırır bu qərarlar. Dövləti ayaqda saxlayan orta sinif rəsmən məhv olub. Günəmuzd işləyənlər aylardır acdır. Aylıq maaş alanlar yarısını alanda şükür edir. Təəssüf ki, cənab Prezidentin böyük humanistliyinin göstərici olan müavinətlər də məhz “Əmək və Əhaliyə Zülm Nazirliyi” tərəfindən əksər hallarda ehtiyacı olana deyil, qarpız partladanlara, ya da Kətanova kimi vayner qırıqlarına dağıdıldı və əhalinin ehtiyac içində olan hissəsinin onda biri ondan faydalana bilmədi. Özəl sektor da çökmüş durumdadı. Deyirlər ki, SMS icazəsi ləğv edilib. Onsuz da düz-əməlli ona əməl edilmirdi və hər yer bağlı olandan sonra küçədə vəlleyli kimi gəzməyin adı nədir? Yeganə düzgün, ancaq gecikmiş qərar çimərliklə bağlı oldu. Ancaq rayonlara gediş-gəlişin olmaması bu dəfə çimərliklərdə ciddi sıxlığa gətirib çıxaracaq ki, bu da növbəti aylar üçün fəlakət deməkdir. Qısacası, Azərbaycan dövləti və xalqı olaraq, TƏBİB-ə və TƏBİB-in klinikalarına işləməyə davam edəcək. Yenilənmiş və nisbətən az sərtləşən karantininiz mübarək!”
Ağanisə Sultan: “Çörəyi nisyə dəftərinə yazdıran insanlara çimərlik yox, iş lazımdır, iş. Zatən istirahət falan kasıblara aid deyil, onlar bir tikə əkməklərinin əsiridilər... Bu ölkədə qanunlar, qaydalar hamısı yalnız kasıblar üçündür. Yaxından tanıdığım insanlar, ailələr var, hər həftə sonu çox rahat rayona gedib qayıdırlar. Hələ nişan edənləri, 30-50 nəfərlik doğum günlərini, ziyafətləri, qurbanlıq aparanları demirəm. Mən karantindən, qanunlardan danışanda, onlar gülürlər...".
Azər İsrafilov: “Operativ Qərargah dərk eləmir ki, çimərliklərin açılması insanların dolanışığı demək deyil?! İnandırım sizi, bu günlərdə eşidəcəksiz ki, insanlar acından yol qırağında ölür. Neyləyək, dərdimizi kimə deyək? Brifinqdə olan rəsmilər niyə çimərliklərin açılmasını uğur kimi qiymətləndirir? Ac qarınla, boş ciblə çimərliyə necə getsinlər? Camaat evində acından ölür, bunlar çimərliklərin nə qədər adam tutmağından danışır. Operativ Qərargah üzvləri 5 aydı camaatı sözlə çimizdirir, indi də suyla çimizdirəcəklər”.
Nüşabə Hüseynli: “Çimərlik axtaran həyətində, eyvanında məsələni həll edib qurtarıb, üzü payıza gedir, insanlara ailəsinin ehtiyacını ödəmək üçün işləməyə, pul qazanmağa şərait yaratmaq da lazımdır axı. Cavabdeh tərəfdən bu şəraitdə işləməyin şərtlərini tələb edin, təklif versin, nə bilim, kömək edin, axır ki, neçə aydır onun-bunun əlinə baxan adamları qurtarın da bu xəcalətdən. Yəni bunun bir yolu yoxdur?”
Zahid Nurəliyev: “O yanacaqdoldurma stansiyalarındakı basabas,o marketlərdə olan tünlük indi də çimərliklərdə olacaq. Mən uca millətimə bələdəm. Qarşıda hələ bir ay var: çim ki çiməsən! Təcili bir onlayn mağazaya ehtiyac var: kupalnik, şortik satmaq üçün. Nə gedər, nə gedər. O çimərlik.az-ı açanlar, görən bunu niyə düşünməyiblər?”.
Gülşən Raufqızı: “Rayonlara gediş-gəliş bağlıdır, amma ekspress avtobuslarda hamı nəfəs nəfəsə gedir. COVID-li xəstənin girdiyi suya girmək isə risk sayılmır Operativ Qərargaha görə. Hansı sualı verirsən şablon bir cavab hazırdı”.
Araz Əhmədov: “Çimərlikləri açan, ancaq açıq havada idman yarışlarının keçirilməsinə icazə verməyən, kafe və restoranları bağlı saxlayan Operativ Qərargahın verdiyi qərarlardan heç özləri də baş açmır. Yaqut xanım hələ əzilə-əzilə deyir ki, mənə tibb sahəsindən sual verin. Bunlar nə yeyir, nə içir? Deputatlara 550 manatı iki dəqiqəyə həll edib verdilər, növbəti 190 manatı isə aylardı müzakirə edirlər”.
Alçina Amilqızı: “Yumşaldılma nəyə deyirsiz, anlamıram? Zatən çimərlik açılırsa, ora sərbəst getmək üçün SMS icazə götürülməlidir də. Belə də ki, əgər iri ticarət, əyləncə mərkəzləri, geyim mağazaları, idman, teatr, kino açılmırsa, SMS icazənin açılmasının nə əhəmiyyəti var?”
Çingiz Özgür: “Operativ Qərargahın brifinqinə Real tv-dən baxa-baxa “lal-kar dilində” xeyli söz öyrənmişəm! Buyun də”çimərlik” sözünü öyrəndim! Siz də deyirsiz, Operativ Qərargah heç nəyə yaramır!”.