Paytaxtın Nəsimi rayonu, Cavadxan küçəsində yerləşən çoxmərtəbəli binanın 17-ci mərtəbəsində baş verən partlayış hadisəsi ilə bağlı FHN və DİN nümayəndələri tərəfindən araşdırma işləri aparılaraq hadisənin fəsadlarının aradan qaldırılması ilə bağlı yerində müvafiq təhlükəsizlik tədbirləri görülməkdədir. Təhlükəsizlik məqsədilə qeyd olunan ünvanın qaz təchizatı dayandırılıb.

Publika.az xəbər verir ki, bu sözləri Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin Baş direktoru Ruslan Əliyev sosial mediada yazıb. Qurum rəhbərinin sözlərinə görə, hadisə yerinin araşdırılması zamanı mənzilin qaz təsərrüfatında bir çox qüsurların olduğu və qaz təsərrüfatında təhlükəsizlik qaydalarının pozulduğu aşkar edilib.

"Bir daha vətəndaşları qazdan istifadə edərkən ehtiyyatlı olmağa, təhlükəsizlik qaydalarına əməl etməyə çağırırıq", - “Azəriqaz” İB-nin Baş direktoru Ruslan Əliyev bildirib.