Yüksək xolesterol qanda xolesterin kimi tanınan yağlı maddənin çox olması deməkdir. Müalicə edilməzsə, bu vəziyyət təhlükəli ola bilər, çünki infarkt və insult riskini artırır. Bunun səbəbi, xolesterolun damarların daralmasına səbəb olaraq qan dövranını çətinləşdirməsidir. Həmçinin xolesterin lövhələri qoparaq təhlükəli qan laxtası yarada bilər.

Medicina.az xəbər verir ki, yüksək xolesterolu olan insanlar adətən uzun müddət heç bir simptomla üzləşmədikləri üçün çox gec olana qədər vəziyyətlərini dərk edə bilmirlər. Xolesterolunuz olub olmadığını dəqiq bilməyin yeganə yolu testdən keçməkdir.
Ancaq saç klinikasının cərrahı Dr. Zeyn Mecid saç tökülməsinin yüksək xolesterin səviyyəsi ilə əlaqəli olduğunu deyir.

"Xolesterol həyat üçün vacib olan lipid (yağ) növüdür. Hüceyrələrin mühüm struktur komponentidir; estrogen, testosteron və kortizol kimi müəyyən hormonların sintezində xəbərçi rolunu oynayır və D vitamininin istehsalında həyati əhəmiyyət kəsb edir. Bu funksiyalara əlavə olaraq, xolesterol saçların siqnal yollarını modulyasiya edir. Bir çox tədqiqatlar göstərir ki, yüksək səviyyəli xolesterin, xüsusilə də "pis xolesterol" kimi tanınan aşağı sıxlıqlı lipoprotein (LDL) ürək-damar riskini artıra bilər. Bu, damarlarda lövhə kimi tanınan yağ yataqlarının yığılmasına, ürək xəstəliyi və insult riskinin artmasına səbəb olur. Yüksək xolesterol səviyyələri həm də saç tökülməsi ilə əlaqəlidir. Saçınız tökülürsə, bu, xolesterol səviyyənizin yüksək ola biləcəyinin potensial əlaməti ola bilər."
Onun sözlərinə görə, araşdırmalar androgenik alopesiya olan kişi və qadınlarda trigliseridlərin (başqa bir növ lipid piy), ümumi xolesterinin və LDL səviyyəsinin əhəmiyyətli dərəcədə yüksək olduğunu müəyyən edib.

“Sizdə yüksək xolesterol səviyyəsi aşkar edilərsə, onu azaltmaq üçün həyat tərzinizdə dəyişikliklər edə bilərsiniz.
Həkiminiz zeytun yağı və çərəz istehlak etmək, doymuş və trans yağları məhdudlaşdırmaq, eləcə də həll olunan lif, Omeqa-3 yağ turşuları və bitki sterolları ilə zəngin qidalara üstünlük vermək kimi ümumi pəhriz dəyişikliklərini tövsiyə edə bilər”, - deyə Dr. Zeyn Mecid qeyd edib.

O, həmçinin məşq miqdarını artırmağı, alkoqol və siqaretdən imtina etməyi məsləhət görüb.

Həkim diqqətə çatdırıb ki, tədqiqatlar yüksək xolesterol səviyyələrinin saç tökülməsi olanlarda daha çox müşahidə edildiyini göstərib, lakin birbaşa əlaqə yoxdur, buna görə də xolesterol səviyyələrini nəzarət altına almaq saç tökülməsini dayandırmaya bilər.

"Saçlar davamlı olaraq böyüdüyü üçün gündə təxminən 50-100 tel saç tökülməsi normaldır. Lakin çox miqdarda saç tökülməsini müşahidə etsəniz (adətən yastığınızda, duşda və ya saçınızı daradığınız zaman müşahidə olunur), əlavə araşdırma üçün həkiminizlə danışmağınız və ya saç tökülməsi üzrə mütəxəssislə məsləhətləşməyiniz daha yaxşı olar”, - Dr. Zeyn Mecid vurğulayıb.