ABŞ, Fransa və digər ölkələrdən olan beynəlxalq alimlər qrupu Marsdakı Qeyl kraterindəki gölün dibində süxurlarda qeyri-normal yüksək səviyyədə manqan oksidləri aşkar ediblər.

Qaynarinfo xəbər verir ki, tədqiqat "Journal of Geophysical Research: Planets" (JGRP) elmi nəşrində dərc olunub.

Komanda NASA-nın "Curiosity" roveri tərəfindən toplanan qayaları təhlil edib. Materiallar qum, gil və lil qarışığıdır.

Tədqiqat qrupu manqanın bu qumlarda necə zənginləşə biləcəyini - məsələn, göl sahili və ya delta estuar qumları vasitəsilə yeraltı suların süzülməsi ilə - və manqanın qumlarda çökməsinə hansı oksidləşdirici maddənin cavabdeh ola biləcəyini araşdırıb.

Mütəxəssislərin fikrincə, manqan oksidləri Marsın səthlərində çətin əmələ gəlir, ona görə də komanda bu elementi belə konsentrasiyalarda tapacağını gözləmirdi.

"Yer kürəsində bu cür çöküntülər hər zaman atmosferimizdə fotosintetik həyat nəticəsində yaranan yüksək oksigen, həmçinin manqan oksidləşmə reaksiyalarını kataliz edən mikroblar səbəbindən baş verir", deyə araşdırmada qeyd edilir.

Tədqiqatın rəhbəri və Los Alamos Milli Laboratoriyasının alimi Patrick Gasda deyib: "Bizim Marsda həyatın olduğuna dair heç bir dəlilimiz yoxdur və Marsın qədim atmosferində oksigen istehsal mexanizmi aydın deyil, ona görə də burada manqan oksidinin necə əmələ gəldiyi və cəmləşdiyi həqiqətən müəmmalıdır".

Alimlər hesab edirlər ki, onların kəşfi qədim Marsın ətraf mühitinin müasir Yerlə oxşarlığını göstərir. Manqan oksidləri qırmızı planetin bir vaxtlar daha çox oksigenə malik olduğunu və mikrob həyatı dəstəklədiyini göstərə bilər.