“Hizbullah”ın lideri Həsən Nəsrullahın ölümü ilə nəticələnən Livana hücum onun İsrailin şimal sərhədində döyüşləri və Fələstinin HƏMAS hərəkatına dəstəyini dayandırmaqdan imtina etməsi səbəbindən həyata keçirilib.
Bu barədə “Axios” mənbələrə istinadən yazıb.
İsrail rəsmilərindən birinin dediyinə görə, “Hizbullah” liderinin aradan götürülməsi qərarı “əməliyyat fürsəti” ərəfəsində verilib. Buna səbəb Həsən Nəsrullahla razılığa gələ bilməməsi olub. “Onun qərar qəbul etmə prosesindən kənarlaşdırılması barədə qərar verilib”, deyə rəsmi əlavə edib.
“Ynet” qəzetinin mənbələri Həsən Nəsrullahın öldürülməsindən sonra İsrail və Livan arasında razılığın əldə olunmasına şərait yarada biləcəyini təsdiqləyib. Nəşr yazır ki, hərəkatın liderini öldürmək planları sentyabrın ortalarında, Livanda elektron partlayışlardan sonra ortaya çıxıb.
Sentyabrın 28-i səhər saatlarında İsrail Müdafiə Qüvvələri “Hizbullah” lideri Həsən Nəsrullahın öldürüldüyünü elan edib. Onun ölümünü sonradan hərəkatın özü də təsdiqləyib. “Ynet” yazıb ki, Həsən Nəsrullahı məhv etmək üçün İDF onun bunkerinin yerləşdiyi əraziyə 80 hava bombası atıb.