Rusiyanın Ukraynaya işğalı başlayandan bəri həlak olan 78329 rusiyalı hərbçinin adlarını müəyyən ediblər.

“AzPolitika” xəbər verir ki, bu barədə BBC Rus Xidmətinin jurnalistlərinin “Mediazona” nəşri və könüllülər qrupu ilə birlikdə açıq məlumatlara əsaslanaraq hazırladıqları hesabatda bildirilir.

Hesablamalar göstərir ki, təsdiqlənmiş ölənlərin sayının artım tempi bütün müharibə ərzində ən yüksək göstəricidir. Sentyabr, oktyabr və noyabr aylarının rəqəmləri 2023-cü ilin rəqəmlərindən bir yarım dəfə, 2022-ci ilin rəqəmləri isə iki dəfədən çoxdur.

Sentyabr ayında tədqiqatçılar hər gün orta hesabla 140 rus hərbçisinin ölümünün təsdiqləndiyini qeyd ediblər. Oktyabr ayında bu rəqəmlər gündə 152 təsdiqlənmiş ölümə yüksəlib.

Ən böyük itkilər könüllülər, tammiqyaslı işğalın başlanmasından sonra ordu ilə müqavilə imzalayanlar arasında idi. Jurnalistlər 16 551 könüllünün ölümünü təsdiqləyə biliblər. Bu, Rusiya tərəfində təsdiqlənmiş itkilərin ümumi sayının 23%-ni təşkil edir. 2024-cü ildə öldürülənlərin orta yaşı 38-dir. Bütün ölümlərin ən azı 56%-i müharibənin əvvəlində Rusiya ordusu ilə birbaşa əlaqəsi olmayan insanlar olub.

Tədqiqat müəlliflərinin fikrincə, itkilərin artması Rusiya ordusunun Donetsk vilayətində aktiv hücumu, eləcə də Kursk vilayətində rus hərbçilərinin ölümünün tədricən ortaya çıxan təsdiqinin nəticəsi ola bilər.

Tədqiqatçılar açıq mənbələrdən gələn xəbərlərə diqqət yetirərək ölənlərin siyahılarını göstərirlər: media, yerli administrasiyaların bəyanatları, sosial şəbəkələrdə qohumların yazıları və qəbiristanlıqlardan alınan məlumatlar.

Jurnalistlərin fikrincə, Rusiya tərəfində real ölənlərin sayı xeyli çox ola bilər.

Moskva və Kiyev Ukrayna müharibəsində itkiləri açıqlamır, yalnız düşmənin itkilərindən danışırlar. Hərbi münaqişələrin tərəfləri öz uğurlarını şişirtməyə və uğursuzluqları azaltmağa meyllidirlər.