Fevralın 9-da keçiriləcək növbədənkənar parlament seçkilərində Yeni Azərbaycan Partiyasının 38 saylı Nizami ikinci (Gəncə) seçki dairəsi üzrə deputatlığa namizədi Naqif Həmzəyev Prezident İlham Əliyevin "Şöhrət" ordeni ilə təltif etdiyi Azərbaycan Milli Elmlər Akademiyasının Gəncə bölməsinin sədri Fuad Əliyevi təbrik edib.
Pravda.az-ın xəbərinə görə, N.Həmzəyev deyib ki, Fuad Əliyev etibarlı dost, yüksək əxlaqi keyfiyyətlərə malik ziyalı, qayğıkeş ailə başçısı, Vətənini, xalqını, dövlətini sevən vətəndaş, həssaslıqla ətrafındakıların qayğısına qalmağı bacaran, mehriban, səmimi bir insandır: "Sözün həqiqi mənasında nurlu şəxsiyyət Allahın ona bəxş etdiyi yetmiş il ömrü şərəflə yaşayıb, xeyirxahlığı, mərdliyi, ağsaqqallığı ilə böyük nüfuza sahib olub. Alim, ziyalı, kamil şəxsiyyət haqqında düşünəndə fəxr edirəm ki, belə bir insanı tanımışam, onunla salam-kəlamım var. Görkəmli alimi, vətənpərvər insan anadan olmasının 70 illiyi münasibətilə təbrik edir, ona möhkəm cansağlığı, daha böyük uğurlar arzulayıram. Azərbaycan Respublikasının Prezidenti cənab İlham Əliyevin sərəncamı ilə Fuad Əliyevin "Şöhrət" ordeni ilə təltif edilməsi fədakar elm xadiminin fəaliyyətinə, dəyərli ağsaqqalımızın ömür yoluna verilən ən böyük qiymət oldu. Təbrik edirəm, Fuad müəllim!"