Zərdab Rayon Polis Şöbəsinin təşkilatçılığı ilə rayonun Məlikumudlu kənd orta məktəbində “Narkomanlığın cəmiyyətə və insanların sağlamlığına zərərli təsirləri”, “Erkən nikah və onun fəsadları”, “Dini radikalizmə qarşı mübarizə” mövzularında məktəblilərlə görüş keçirilib. Tədbirdə polis şöbəsinin əməkdaşları ictimaiyyət nümayəndələri , eləcə də məktəbin müəllim və şagird kollektivi iştirak ediblər.

Teref.az xəbər verir ki, tədbirdə çıxış edən polis əməkdaşaları narkomaniyanın fəsadlarından, ölkəmizdə narkomaniyaya qarşı aparılan mübarizə haqqında məlumat veriblər. Qeyd edilib ki, narkomanların əksəriyyəti müxtəlif sağalmaz xəstəliklərə düçar olaraq öz həyatları ilə bərabər ailə üzvlərinin də həyatlarını məhv edirlər.

Daha sonra tədbirdə çıxış edən qonaqlar ölkəmizdə dini radikalizmə qarşı aparılan mübarizə tədbirlərin söz açıblar. Çıxış edən polis əməkdaşları şagirdlərə qeyri-ənənəvi, insanları radikal çağırışlara səsləyən dini təriqətlərdən uzaq olmağı tövsiyyə ediblər. Tədbirdə həmçinin erkən qurulan ailələrdə sonradan yaşanan faciələrdən də bəhs edilib. Belə halların aradan qaldırılması üçün ictimai qınaqla bərabər valideynlərin də mövzuya daha həssas yanaşmalarının vacib olduğu bildirilib.

Sonda polis əməkdaşları tərəfindən məktəblilərin sualları cavablandırılıb.