teref.az - Məcburi köçkünlərin məskunlaşdığı “Qarabağ” qəsəbəsindəki Ağdam rayon 30 nömrəli tam orta məktəbi Xocalı faciəsinin 25-ci ildönümünə həsr olunmuş tədbir keçirib. İştirakçılar-müəllimlər, şagirdlər, qəsəbə sakinləri əvvəlcə Nizami Gəncəvi küçəsi ilə Mübariz Orucov küçəsinin kəsişməsində ucaldılmış Soyqırım –“Ana harayı” abidəsini ziyarət ediblər.
Hərbi formalı şagirdlər dövlət bayrağını salona gətiriblər. Xocalı faciəsi zamanı Qarabağ müharibəsində şəhid olan vətən övladlarının xatirəsi bir dəqiqəlik sükutla yad edilib. Azərbaycan Himni səsləndirilib.
30 saylı məktəbin direktoru Zahid Namazov, dövlət qulluğu veteranı Valeh Salehov və qocaman müəllim Mürşüd Məmmədov çıxış edib, Xocalı faciəsinin səbəkarlarından, bu faciənin gətirdiyi məhrumiyyətlərdən,dövlətimizin Xocalı sakinlərinə göstərdiyi qayğıdan və torpaqlarımızın gec-tez geri qaytarılacağından danışıblar.
Xocalıya və Xocalı faciəsinə həsr olunmuş şerlər səsləndirilib, ədəbi-bədii kompozisiyalar nümayiş etdirilib, mahnılar səsləndirilib.
Kədər və böyük ümid yüklü olan bu tədbir bir daha göstərdi ki, Xocalı faciəsinin ağır dərdi qəlblərdə yaşayır və o nəsilləri daim mübarizəyə səsləyir.