ABŞ Nümayəndələr Palatasının Nəzarət Komitəsindəki demokratlar milyarder Cefri Epsteynə aid olduğu iddia edilən sənədləri yayımlayıblar. Sənədlər arasında keçmiş prezident Donald Tramp tərəfindən imzalandığı iddia edilən seksual xarakterli məktub da yer alıb. Tramp isə bu məktubla hər hansı əlaqəsini qəti şəkildə təkzib edib.
Ajans.az Associated Press-ə istinadən xəbər verir ki,məktubun 2003-cü ildə, Trampın o dövrdə dostluq münasibətində olduğu Epsteynin 50 illik yubiley albomu üçün yazıldığı iddia edilir. Albomda keçmiş prezident Bill Klinton, hüquqşünas Alan Dershowitz və digər tanınmış şəxslərin də adları yer alır. Yayımlanan sənədlərdə seksual məzmunlu və açıq dillə yazılmış digər yazılar da var.

Tramp isə həmin məktubu yazmadığını, məktubun tərkibindəki qadın rəsmini də çəkmədiyini bildirib. O, bu məsələ ilə bağlı The Wall Street Journal-a qarşı 10 milyard dollarlıq böhtan iddiası qaldırdığını açıqlayıb.

Ağ Evin mətbuat katibi Karolin Leavitt sosial media platforması X-də verdiyi açıqlamada bildirib:

“Başdan bəri dediyim kimi, Prezident Tramp bu şəkli nə çəkib, nə də imzalayıb. Bu çox aydındır.”

Ağ Evin aparat rəhbərinin müavini Taylor Budoviç də Trampın imzasının əvvəllər paylaşılmış nümunələri ilə müqayisə apararaq, məktubda yer alan imzanın ona məxsus olmadığını deyib.

Respublikaçı qanunvericilər də məktubun həqiqiliyini şübhə altına alıblar. Florida ştatının konqresmeni Bayron Donalds deyib:

“Bu, onun imzası deyil. Mən Donald Trampın bir milyon sənədə imza atdığını görmüşəm.”

Nümayəndə Tomas Massi isə bu sənədin hüquqi və ya ictimai əhəmiyyətini kiçiltməyə çalışaraq bildirib:

“Bu məktub heç nəyi sübut etmir. Bu, sağ qalanlara və qurbanlara yardım etmir.”

Tramp da eyni mövqedə qalaraq bəyan edib:

“Bunlar nə mənim sözlərimdir, nə də danışıq tərzimdir. Üstəlik, mən şəkil də çəkmirəm.”

Məktubda Trampın adının yazıldığı və ona məxsus imzaya bənzəyən bir imza olduğu bildirilir. Mətnin ətrafı isə əyri bədənli qadının əllə çəkilmiş konturları ilə bəzədilib. Məktubda belə yazılır:

“Dost olmaq gözəl şeydir. Ad günün mübarək – və hər gün başqa bir gözəl sirr ola bilər.”

Bu məktubun açıqlanması Konqresdə Epstein işi ilə bağlı sənədlərin tam şəkildə ictimaiyyətə təqdim olunması üçün artan ikipartiyalı təzyiqlərlə eyni vaxta təsadüf edir. Ədliyyə Departamenti artıq avqust ayında Epstein-in cinsi istismar işi ilə bağlı bəzi sənədləri Nümayəndələr Palatasının Nəzarət Komitəsinə təqdim etməyə başlayıb.

Komitə ötən ay Epstein-in əmlakına qarşı çağırış göndərərək, onun son vəsiyyətnaməsini, prokurorlarla imzalanmış müqavilələri, əlaqə kitabçalarını, maliyyə əməliyyatlarını və digər sənədləri tələb edib.

Epstein və keçmiş ortağı Ghislaine Maxwell yetkinlik yaşına çatmayan qızlara qarşı cinsi istismar, alver və zorakılıq ittihamları ilə dünya səviyyəsində rezonans doğurmuşdu. Tramp isə Epstein ilə münasibətlərinin iyirmi il əvvəl pozulduğunu və səbəbin onun şəxsi kurortu olan Mar-a-Laqoda çalışan gənc qadınlara “toxunması” olduğunu demişdi.