Tokio hökuməti iyunun 11-də koronavirusa yeni yoluxanların sayı azalacağı təqdirdə, tətbiq etdiyi xəbərdarlığı aradan qaldırmağı planlaşdırır.

AZƏRTAC xəbər verir ki, bu barədə NHK telekanalı Tokio hökumətindəki mənbələrə istinadla məlumat yayıb.

Xatırladaq ki, paytaxt hökuməti infeksiyaya yoluxanların sayının artmasına görə iyunun 2-də “Tokio xəbərdarlığı” elan edib. Lakin son günlər vəziyyət xeyli sabitləşib. Ötən günün məlumatına görə, Tokioda cəmi 18 yoluxma halı qeydə alınıb ki, bununla da son dörd gündə həmin göstərici 20-dən aşağı olub. Bu isə o, deməkdir ki, xəbərdarlığın götürülməsi üçün 3 indikatordan ikisi aradan qalxıb.

Bununla yanaşı, xəbərdarlıq aradan qaldırılarkən mütəxəssislərin rəyi əsas götürüləcək. Hazırda onların məsələni araşdırdığı bildirilir. Qeyd edilir ki, onlar məhdudiyyətlərin ikinci dərəcədən üçüncüyədək yumşaldılması imkanlarını da araşdırırlar.

Qeyd edək ki, üçüncü mərhələ restoranların gecə yarıyadək işləməsini və karaoke klublarının biznesi bərpa etməsini nəzərdə tutur.