Gürcüstanda restoran və idman zallarına daxil olmaq üçün COVID-19 pasportunun tələb edilməsi planlaşdırılır.

AZƏRTAC xəbər verir ki, bu qaydaların tətbiqi ilə əlaqədar ölkənin Xəstəliklərə Nəzarət və İctimai Sağlamlıq Milli Mərkəzi Gürcüstan hökumətinin Qurumlararası Koordinasiya Şurasına müraciət edib.

Müraciətdə sentyabrdan etibarən restoranlara, iaşə obyektlərinə, spa və idman zallarına, eləcə də digər bənzəri ictimai obyektlərə vətəndaşların yalnız yeni növ koronavirus əleyhinə vaksinin bir və ya hər iki dozasının vurulmasını göstərən sənəd və ya PZR testinin neqativ nəticəsi ilə buraxılması tövsiyə edilib.

Qurumlararası Koordinasiya Şurasının nümayəndəsi Giorgi Qibradze bildirib ki, şura məsələni müzakirə edəcək və qəbul olunacaq qərarla bağlı ictimaiyyət məlumatlandırılacaq.