ABŞ təhlükəsizlik zəmanətləri ilə bağlı cavabında ən vacib suala – NATO-nun şərqə doğru genişlənib-genişlənməyəcəyinə cavab verməyib.

NOCOMMENT modern.az-a istinadən xəbər verir ki, bunu Rusiyanın xarici işlər naziri Sergey Lavrov bildirib.

“Bu sənəddə əsas məsələyə müsbət reaksiya yoxdur. Əsas məsələ NATO-nun şərqdə daha da genişlənməsinin və Rusiya Federasiyasının ərazisini təhdid edə biləcək zərbə silahlarının yerləşdirilməsinin yolverilməzliyi ilə bağlı aydın mövqeyimizdir”, – deyə Lavrov jurnalistlərə bildirib.

ABŞ və NATO bir gün əvvəl Rusiyanın təhlükəsizlik zəmanəti təkliflərinə cavab verib. ABŞ dövlət katibi Entoni Blinkenin bəyanatlarına əsaslanan Amerika sənədi ABŞ-ın Rusiyanın təhlükəsizlik tədbirləri ilə bağlı narahatlığını və ölkələrin ümumi dil tapa biləcəyi sahələrə dair təkliflərini əks etdirir.

2021-ci ilin sonunda Rusiya ABŞ ilə müqavilənin və NATO ilə təhlükəsizlik təminatına dair sazişin layihələrini dərc edib. Moskva Qərbdən xüsusilə NATO-nun şərqə doğru genişlənməsindən, Ukraynanın Şimali Atlantika Alyansına qəbulundan və postsovet ölkələrində hərbi bazaların yaradılmasından imtina etmək üçün hüquqi təminat tələb edirdi. Təkliflərdə NATO-nun zərbə silahlarının Rusiya sərhədləri yaxınlığında yerləşdirilməməsi və Şərqi Avropadakı alyans qüvvələrinin 1997-ci ildəki mövqelərə çıxarılması ilə bağlı bənd də var idi.