Ukraynanın səhiyyə sistemi son dərəcə gərgin şəraitdə işləyir və onun dağılması fəlakətə səbəb olacaq. AzVision.az xəbər verir ki, bu barədə Ümumdünya Səhiyyə Təşkilatı (ÜST), Birləşmiş Millətlər Təşkilatının Uşaq Fondu (UNICEF) və Birləşmiş Millətlər Təşkilatının Əhali Fondunun (UNFPA) birgə bəyanatında deyilir. Təşkilatlar döyüşlər səbəbindən səhiyyə xidmətlərinə çıxışın əhəmiyyətli dərəcədə məhdudlaşdırıldığını bildirib. Ukraynada doğum evləri də daxil olmaqla xəstəxanaların oksigen və tibbi ləvazimatlarla təminatı çətinləşir.

Fevralın 24-dən Ukraynada 4,3 mindən çox doğuş qeydə alınıb, növbəti üç ayda isə 80 min qadının uşaq dünyaya gətirməsi gözlənilir. “Səhiyyə infrastrukturuna hücumlara dərhal son qoyulmalıdır. 31 belə hadisə baş verib, nəticədə 12 nəfər ölüb, 34 nəfər xəsarət alıb. Tibb müəssisələri, təcili yardım maşınları sıradan çıxarılıb”,- deyə məlumatda qeyd olunur.