Almaniya Ukrayna hadisələrinə görə aclıq problemi ilə üzləşə biləcək ölkələrə yardım etmək niyyətindədir.

“Report” xəbər verir ki, bunu Almaniya kansleri Olaf Şolts deyib.

“İndi biz aclıqdan əziyyət çəkəcək, öz əhalisi üçün taxıl almağa gücü çatmayan dövlətlərin olmasından narahat olmalıyıq. Biz bu kasıb ölkələri tərk etməyəcəyik, onlara dəstək olacağıq”, - kansler bildirib.

Kanslerin sözlərinə görə, hazırda əsas taxıl tədarükçülərindən biri olan Ukrayna ixrac imkanları məhduddur.

Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) daha əvvəl məlumat vermişdi ki, dünya ərzaq qiymətləri mart ayında 12,6% artaraq ən azı 1990-cı ildən bəri rekorda imza atıb. Buna bitki yağlarının, dənli bitkilərin və ətin rekord qiymət artımı, şəkər və süd məhsullarının qiymətlərinin əhəmiyyətli dərəcədə artması səbəb olub. Belə ki, fevral ayı ilə müqayisədə bitki yağının (günəbaxan, xurma, soya və kolza) qiymət indeksi 23,2 faiz, dənli bitkilərin qiymət indeksi 17,1 faiz, o cümlədən buğdanın (19,7 faiz), şəkərin qiymət indeksi 6,7 faiz artıb.