Moskvanın Presnensk rayon məhkəməsi Azərbaycan əsilli biznesmen Roman Manaşirovun barəsində çıxarılmış həbs qətimkan tədbirini avqustun 19-na qədər uzadıb. O, 2 milyon rubl rüşvətin alınmasında vasitəçilik etməkdə ittiham olunur.

Biznesmenin adı Rusiya DİN-in müstəntiqlərinin “AST Cargo” şirkətinin sahibi olan digər Azərbaycan əsilli yəhudi iş adamı Januko Rafailovu həbsdən buraxmaq üçün rüşvət almasına görə qaldırılmış cinayət işində keçir. İttihama əsasən Manaşirov dostu və ortağı Rafailovu həbsdən buraxdırmaq üçün müstəntiqlərə rüşvət verib. Manaşirov özü isə vyetnamlıları qul kimi istismar etməkdə ittiham olunur və 2014-cü ildə həbs olunub.

Bu ilin aprel ayında Roman Manaşirovun qardaşı Solomon Manaşirova qarşı da cinayət işi qaldırılıb. Onu 98 milyon rubl məbləğində vergi gizlətməkdə ittiham edirlər. Lakin Rusiya hüquq-mühafizə orqanları Solomon Manaşirovu tuta bilməyib. Biznesmen vaxtında aradan çıxıb və məlumatlara görə İsrailə qaçıb. Onun eyni zamanda İsrail vətəndaşlığı daşıdığı məlumdur. Solomon Manaşirovun İsraildən Rusiyaya ekstradisiyası qeyri-mümkündür.

Solomon və Roman Manaşirov qardaşları “Forbes”in versiyasına görə Rusiyanın daşınmaz əmlak kralları arasında yer alır. Onların Moskvada “Armada” mebel mərkəzi, “Gemm” ticarət-əyləncə mərkəzi, digər çoxsaylı kommersiya daşınmaz əmlakı var. Bu əmlakı icarəyə vermək üçün Manaşirov qardaşları 20-yədək şirkət təsis edib.

Rusiya mənbələri qeyd edir ki, Solomon və Roman Manaşirov qardaşlarına qarşı təqiblər təsadüfi olmaya bilər. Bəzilərinə görə bu təqiblərin arxasında onların biznesini ələ keçirmək istəyən, Kremldə güclü himayəsi olan digər yəhudi əsilli azərbaycanlı biznesmenlər-Qod Nisanov və Zarah İliyev, habelə onların ortağı İlham Rəhimov dayana bilər. Hər halda görünən odur ki, Manaşirov qardaşlarından birini həbsindən, digərinin qaçmasından sonra onların biznesinin çökdürülməsi qaçılmazdır. Rusiya mətbuatı Manaşirov qardaşlarının digər yəhudi əsilli azərbaycanlı biznesmen Telman İsmayılovun aqibətini yaşadığını qeyd edir.


Manaşirovlar Bakıda, dağ yəhudisi ailəsində anadan olub. Ötən əsrin 90-cı illərinin əvvəllərində Moskvaya gedib və bizneslə məşğul olmağa başlayıb. Telman İsmayılova Moskvada biznes qurmağa kömək edən də Manaşirov qardaşları olub. T.İsmayılov “Çerkizovsk” bazarını onların sayəsində açıb. Kifayət qədər zəngin adam olan Roman Manaşirov dağ yəhudiləri icmasının liderlərindən biridir. Ancaq publika arasında görünməyi elə də xoşlamırdı.