Çinin Hunan vilayətində “Vangu” qızıl sahəsində rekord həcmdə yüksək keyfiyyətli qızıl yatağı tapılıb.

Valyuta.az xəbər verir ki, ilkin hesablamalara görə, yataqda təxminən 998 metrik ton (1 100 ABŞ ton) qızıl mövcuddur ki, bu da 83 milyard ABŞ dolları dəyərində qiymətləndirilir.

Ərazi 1,9 kilometr dərinlikdə yerləşən 40 qızıl daşıyan damar ilə seçilir. Nümunələrdə gözlə görünən qızıl hissəcikləri müşahidə olunub, bu isə yatağın yüksək keyfiyyətli olduğunu təsdiqləyir.

Yataqda hər ton süxurda 138 qram qızıl müəyyən edilib ki, bu da qlobal ortalamanın dəfələrlə üstündədir. Müqayisə üçün, Cənubi Afrikadakı ən böyük "South Deep" mədənində ehtiyatlar 900 ton civarındadır.

Hazırda 65 kilometr uzunluğunda qazma işləri aparılır. Çin hökuməti 2025-ci ilin sonunadək əlavə 55 ton, beşillik plan çərçivəsində isə 110 ton qızıl resursu aşkar etməyi hədəfləyir.

Bu kəşf “qızılın pik dövrü”nə çatdığımızla bağlı iddiaları sual altına alır və yerin dərinliklərində hələ böyük ehtiyatların mövcud ola biləcəyini göstərir.