Seçki rəsmiləri bazar ertəsi son doqquz il ərzində hakimiyyətdə olan Misir prezidenti Əbdül Fəttah Əl-Sissinin üçüncü dəfə altı il müddətinə prezident seçildiyini elan edib. O, faktiki olaraq, məlum olmayan üç rəqiblə mübarizə aparıb.

Milli Seçki Komissiyasının bildirdiyinə görə, Əl-Sissi 89,6% səs toplayaraq qələbə əldə edib. 67 milyondan çox insanın qeydə alındığı seçkilərdə seçici fəallığı 66,8 faiz təşkil edib.

"Səsvermə faizi Misir tarixində ən yüksək göstəricidir", seçki komissiyasının sədri Hazem Badavi televiziya ilə yayımlanan mətbuat konfransında rəsmi nəticələri açıqlayaraq deyib.

Səsvermə Misirin şərq sərhədində Qəzzada daha geniş regional münaqişəyə çevrilmək təhlükəsi ilə bağlı narahatlıqlar fonunda İsrail və HƏMAS arasında müharibənin kölgəsində qalıb.

Şimali Afrika ölkəsi eyni zamanda iqtisadi böhran içərisindədir və ölkədə aylıq inflyasiya 30%-dən yuxarıdır. Rəsmi rəqəmlərə görə, son 22 ayda Misir funtu dollar qarşısında dəyərini 50% itirib və ölkənin 105 milyon əhalisinin üçdə biri artıq yoxsulluq içərisində yaşayır.

Bölgədə Qərbin əsas müttəfiqi olan Əl-Sissi Misirdə insan haqlarının vəziyyətinə və müxalifətə qarşı sərt repressiyalara görə beynəlxalq tənqidlərlə üzləşib. Ordu zabiti olan Əl-Sissi müdafiə naziri olaraq, seçilmiş, lakin bölücü İslamçı prezidentin bir illik iqtidarına qarşı kütləvi küçə etirazları fonunda 2013-ci ildə onu hakimiyyətdən devirən hərbi çevrilişə rəhbərlik edib.

Əl-Sissi ilk dəfə 2014-cü ilin ortalarında prezident seçilib. O daha sonra 2018-ci ildə yenidən seçilib. Bir il sonra isə ümumi referendumda qəbul edilən konstitusiya dəyişikliklərinə əsasən, Əl-Sissinin ikinci müddətinə iki il əlavə edilib və ona altı illik üçüncü müddətə namizəd olmağa imkan verib.