“Dünyanın damı” və ya “dünyanın üçüncü qütbü” adı verilən Thinhay-Tibet yaylasında insanlar ən azı 50 min ildir ki məskunlaşıb.

Bunu çinli alimlərin araşdırmasının nəticələri sübut edir.

Arxeoloqlar ölkənin cənub-qərbindəki Sitsanq muxtar bölgəsində yerləşən Melonq Taqphuq mağarasında qazıntı işləri aparıblar. Alimlərin araşdırmaları altı il davam edib.

Əvvəllər hesab olunurdu ki, insanlar bu torpaqlarda təxminən 40 min il əvvəl məskunlaşıblar. Lakin indi bu məlumatlar təkzib olunub. Qazıntılar zamanı mağarada 10 mindən çox artefakt aşkar edilib. Onların arasında daş məmulatları, keramik qablar, sümüklər və başqa müxtəlif əşyalar olub. Tapıntılar paleolitdən erkən dəmir dövrünə qədər olan dövrə aiddir.

Bəzi alimlər mağarada tapılan mədəniyyət obyektlərinin 80 min ildən çox əvvəl hazırlana biləcəyini irəli sürürlər. Bəzi artefaktların yaşı hələ müəyyən edilməyib.
Mağaranın içərisində həmçinin qayaüstü rəsmlər də aşkar edilib. Onların üzərində şaquli zolaqlar və insan fiqurları var. Mağaranın iqlim amilləri, o cümlədən sürüşmələr səbəbindən uzun müddət tərk edildiyi ehtimal edilir. Ancaq sonra insanlar burada yenidən məskunlaşıblar.



Mənbə: Xinhua