Buryatiya Respublikasının Bıçur mahalında 5 yaşlı oğlan traktorun altına düşərək az qala ayağını itirəcəkdi.

32gun.az Rusiya mediasına istinadən xəbər verir ki, bu barədə Bıçur rayonu administrasiyasının mətbuat xidməti məlumat yayıb.

Hadisə iyulun 30-da baş verib. Uşağın ayağı hərəkətdə olan traktorun hissələrinə ilişərək qismən travmatik amputasiya olunub.

Uşaq dərhal xəstəxanaya çatdırılıb və təcili əməliyyat edilib. “Əməliyyat dörd saat davam etdi. Cərrah Dmitri Mamontov və komandasının peşəkar fəaliyyəti nəticəsində uşağın ayağını xilas etmək mümkün oldu. Hazırda o, Uşaq Respublika Klinik Xəstəxanasında müalicə alır, vəziyyəti stabildir,” – deyə mətbuat xidmətindən bildirilib.

Administrasiya bu cür hadisələrin ilk dəfə olmadığını vurğulayıb və valideynləri azyaşlıları ot biçini zamanı texnika yaxınlığında qoymamağa çağırıb.