"Audi" rəhbərliyi ABŞ-da ilk zavodunu açmaq imkanını nəzərdən keçirir.

Valyuta.az xəbər verir ki, bu barədə Almaniyanın “Handelsblatt” qəzeti mənbələrə istinadən məlumat yayıb.

Onların fikrincə, zavod tikmək qərarı verilərsə, "Audi" böyük ehtimalla onu Tennessi ştatının Çattanoqa şəhərində açacaq. Artıq orada "Audi"nin də daxil olduğu "Volkswagen" (VW) avtokonserninin zavodu var, ona görə də belə yerləşmə logistika və digər məsələlərin həllini asanlaşdıracaq.

Eyni zamanda, mənbələrin məlumatına görə, zavodun tikintisi ilə bağlı yekun qərar hələ verilməyib. "Handelsblatt" yazır ki, zavodun tikintisinin dəyəri bir neçə milyard avro qiymətləndirilir və onun tikinti müddəti iki ildir. Belə bir zavodun istehsal gücü, əgər işə salınarsa, ildə 150-200 min avtomobil üçün nəzərdə tutulacaq.

Mənbələrin qeyd etdiyi kimi, "Audi" hazırda Avropa İttifaqından idxal olunan mallar üçün rüsumların 15%, şirkətin zavodu olduğu Meksikadan gələn avtomobillər üçün isə 25% müəyyən edildiyi şəraitdə müxtəlif variantları nəzərdən keçirir. Handelsblatt-ın məlumatına görə, VW-nin baş direktoru Oliver Blume ABŞ prezidenti Donald Trampın administrasiyası ilə müxtəlif variantlar barədə danışıqlar aparır.