NATO-nun baş katibi Yens Stoltenberq bazar ertəsi deyib ki, hökumətlər Ukraynanın Rusiya ərazisində Rusiya qüvvələrini hədəf almaq üçün hərbi yardımdan istifadə etməsinə qarşı məhdudiyyətləri yenidən nəzərdən keçirməlidirlər. O, bu məhdudiyyətlərin Ukrayna qüvvələrinin müdafiə imkanlarını azaltdığını bildirib.

Bolqarıstana səfəri zamanı danışan Stoltenberq Rusiyanın 2022-ci ilin əvvəlində başladığı təcavüzün beynəlxalq hüququn pozulması olduğunu və Ukraynanın özünü müdafiə etmək, eləcə də "Ukrayna hüdudlarından kənarda qanuni hədəfləri" vurmaq hüququna malik olduğunu deyib.

"Biz bunu indi Xarkivdəki döyüşlərdə çox aydın şəkildə görürük", Stoltenberq deyib. "Rusiya qüvvələri Ukrayna ərazisinə Rusiya ərazisindən, sərhədin o tayından hücum edir. Cəbhə xətti sərhəd xəttidir və siz sərhədin o biri tərəfində olduqları üçün Rusiya qüvvələrinə hücum edə bilmirsinizsə, əlbəttə ki, bununla Ukrayna qüvvələrinin özlərini müdafiə etmək imkanlarını həqiqətən azaldırsınız" - deyə, o bildirib.

Stoltenberq NATO-nun özü-özlüyündə münaqişənin tərəfi olmadığını bir daha təkrarlayıb, lakin eyni zamanda bildirib ki, NATO müttəfiqləri Ukraynaya hərbi dəstək verməklə özünümüdafiə hüququnu dəstəkləməkdə yardım etmək hüququna malikdirlər.

NATO baş katibi bu açıqlamaları Ukrayna prezidenti Volodimir Zelenskinin Rusiya daxilindəki hədəflərə zərbə endirmək üçün ABŞ-ın verdiyi silahlardan istifadə etməsini qadağan edən ABŞ kimi ölkələrin siyasətinə istinad edərək, Ukraynanın tərəfdaşlarını "rusiyalı terrorçulara qarşı preventiv müdafiəni dəstəkləməyə" çağırmasından bir neçə saat sonra verib.

ABŞ Dövlət Departamentinin sözçüsü Metyu Miller keçən həftə Amerikanın Səsinə bildirib ki, Birləşmiş Ştatlar "Ukraynanın hüdudlarından kənarda zərbələrə icazə vermir", lakin Ukrayna başqaları tərəfindən verilən silahlarla bağlı qərarını özü verir.

"Ukrayna suveren bir ölkədir və onlar başqa yerlərdən əldə etdikləri və ya özləri hazırladıqları, ya da özləri istehsal etdikləri silahlardan, məsələn, onlardan necə istifadə edildiyini gördüyünüz kimi istehsal etdikləri bəzi dronlardan istifadə etmək məsələsində öz qərarlarını özləri verməli olacaqlar", Miller deyib.