Böyük Britaniyanın baş naziri Keir Starmer Almaniya kansleri Olaf Şolz ilə çərşənbə günü Berlində görüşür. Keçən ay vəzifəyə gəldikdən sonra ilk ikitərəfli səfərində ölkələr arasında yeni tərəfdaşlığı müzakirə edəcək.

Parisə də səfər edəcək Britaniya lideri avropalı müttəfiqləri ilə Brexit nəticəsində zədələnmiş etimadı bərpa edəcəyinə söz verib və Almaniya ilə yeni ikitərəfli sazişin imzalanması üçün Şolz ilə danışıqlar keçirir.

Leyboristlər Partiyası iyulun 4-də keçirilən ümummilli seçkilərdə qalib gələcəyi təqdirdə Almaniya ilə təhlükəsizlik və müdafiə müqaviləsi bağlamağa çalışacağını bildirmişdi.

Starmerin Downing Street ofisindən verilən məlumata görə, Britaniyanın Fransa ilə 2010-cu ildə imzaladığı Lancaster House müqaviləsinə bənzəyəcəyi gözlənilən yeni sazişin danışıqları bir neçə ay çəkəcək və gələn ilin əvvəlində yekunlaşacaq.

"Böyük Britaniyanın Avropa ilə münasibətlərinin daha geniş şəkildə yenidən qurulmasının əsas sütunu" hazırda müzakirə olunan və bu ilin sonunda yekunlaşması gözlənilən ikitərəfli müdafiə sazişi olacaq.

Proqramın məqsədi biznes və ticarəti inkişaf etdirmək, müdafiə və təhlükəsizlik sahəsində əməkdaşlığı dərinləşdirmək və "qeyri-qanuni miqrasiya ilə mübarizə üçün birgə fəaliyyəti gücləndirməkdir" - deyə, Starmerin ofoso bildirib.

Şolz cümə günü Solingen şəhərində islamçıların bıçaqlı hücumundan sonra qeyri-qanuni miqrasiya ilə mübarizəyə görə təzyiqə məruz qalıb. 3 nəfərin ölümü və 8 nəfərin yaralanması ilə nəticələnən hücumun Almaniya rəsmilərinin deportasiya cəhdlərindən yayınan 26 yaşlı suriyalı tərəfindən törədildiyi iddia edilir.

Bu arada, Starmerin baş nazirliyi keçən ay Soutportda ölümcül bıçaqlanma hücumunun immiqrasiya əleyhinə iğtişaşlara səbəb olduqdan sonra problemlə üzləşib. Səlahiyyətlilər bunun ifrat sağçı elementlər və yalan məlumatlardan qaynaqlandığını bildirib.

Berlinə səfəri zamanı Starmer bildirməlidir ki, Almaniya və Fransa ilə əlaqələrin gücləndirilməsi qeyri-qanuni miqrasiya ilə mübarizə və “bütün qitədə və ən əsası Böyük Britaniyada iqtisadi artımı stimullaşdırmaq üçün çox vacibdir”.

Starmer və Scholz arasındakı danışıqlarda Ukraynaya hərbi dəstək də diqqət mərkəzində olacaq. Belə ki, hər iki ölkə Rusiyanın işğalına qarşı Kyivə yardımla bağlı təzyiqlərə məruz qalıb.

Kyivin Qərb müttəfiqləri Ukraynanın bu yaxınlarda Kurska müdaxiləsinə ehtiyatla reaksiya verib. Onların silahlarının Rusiya torpaqlarında istifadə oluna biləcəyindən ehtiyat edir və bu, Moskvanın kəskin reaksiyasına səbəb ola bilər.

Britaniya Kyivə öz mülahizəsinə uyğun olaraq Britaniya istehsalı olan 14 “Challenger 2” tankından ibarət eskadrilya verməyə icazə versə də, özünün “Storm Shadow” uzaqmənzilli raketlərinin istifadəsinə məhdudiyyətlər qoyub.

Almaniya isə münaqişənin gərginləşməsindən ehtiyat etdiyinə görə dəfələrlə Ukraynanı uzaqmənzilli “Taurus” raketləri ilə təmin etməkdən imtina edib. Almaniya Ukraynaya ABŞ-dan sonra ikinci ən böyük yardım donoru olsa da, gələn il yardım büdcəsini iki dəfə azaltmağı planlaşdırır.